రాయలసీమ న్యూస్, అనంతపురం: అనంతపురం: అనంతపురం నగరంలోని మారుమూల ప్రాంతాల్లోని ఇళ్ల వరకు చెత్త సేకరణ వాహనాలు చేరేలా చర్యలు తీసుకుంటున్నట్లు అర్బన్ ఎమ్మెల్యే దగ్గుపాటి ప్రసాద్ తెలిపారు. అనంతపురం నగరపాలక సంస్థకు ప్రభుత్వం కేటాయించిన ఈ-ఆటోలను ఎమ్మెల్యే దగ్గుపాటి ప్రసాద్, ఎంపీ అంబికా లక్ష్మీనారాయణ సంయుక్తంగా ప్రారంభించారు.
నగరపాలక సంస్థకు మొత్తం 62 ఈ-వాహనాలను ప్రభుత్వం కేటాయించగా, తొలి విడతగా 15 వాహనాలు అందుబాటులోకి వచ్చినట్లు అధికారులు పేర్కొన్నారు. ఈ వాహనాల ద్వారా నగరంలోని అన్ని వార్డుల్లో గృహాల వద్దకే వెళ్లి చెత్తను సేకరించే విధంగా ప్రణాళిక రూపొందించినట్లు మున్సిపల్ వర్గాలు తెలియజేశాయి.
ఈ సందర్భంగా ఎమ్మెల్యే దగ్గుపాటి ప్రసాద్ మాట్లాడుతూ, ముఖ్యమంత్రి చంద్రబాబు నాయుడు వినూత్న ఆలోచనతో కాలుష్య రహిత చెత్త సేకరణ వాహనాలను అందుబాటులోకి తీసుకొచ్చారని అన్నారు. చిన్న చిన్న సందుల్లోకి సైతం ఈ-వాహనాలు వెళ్లి చెత్తను సేకరించే అవకాశం ఉందని ఆయన వివరించారు. ప్రజలు సహకరించి తమ చెత్తను ఈ-వాహనాలకు అందజేయాలని ఎమ్మెల్యే కోరారు.
గత ఐదేళ్లలో వైసీపీ ప్రభుత్వం భారీగా చెత్త పేరుకుపోయేలా చేసిందని ఎమ్మెల్యే దగ్గుపాటి విమర్శించారు. అనంతపురం డంపింగ్ యార్డులో పేరుకుపోయిన మూడు లక్షల టన్నుల చెత్తలో ఇప్పటికే రెండు లక్షల టన్నులను తొలగించామని, మిగిలిన చెత్తను కూడా త్వరలోనే పూర్తిగా తొలగించే కార్యక్రమం కొనసాగుతున్నట్లు ఆయన చెప్పారు.
అదే ప్రాంతంలో సుమారు 15 కోట్ల రూపాయల వ్యయంతో ఫ్రెష్ వేస్ట్ మేనేజ్మెంట్ ప్లాంట్తో పాటు పార్కును ఏర్పాటు చేయనున్నట్లు ఎమ్మెల్యే దగ్గుపాటి ప్రసాద్ వెల్లడించారు. ఈ ప్రాజెక్టులు అమలులోకి వస్తే అనంతపురం నగరంలో చెత్త నిర్వహణ వ్యవస్థ మరింత మెరుగుపడటంతో పాటు పర్యావరణ పరిరక్షణకు కూడా తోడ్పడుతుందని ఆయన అభిప్రాయపడ్డారు.
మరోవైపు ఎంపీ అంబికా లక్ష్మీనారాయణ మాట్లాడుతూ, దేశంలో వినూత్న కార్యక్రమాలు ఆంధ్రప్రదేశ్ నుంచి ప్రారంభం కావడం ముఖ్యమంత్రి చంద్రబాబు నాయుడి విజన్కు నిదర్శనమని పేర్కొన్నారు.
దేశంలో వినూత్న కార్యక్రమాలు ఆంధ్రప్రదేశ్ నుంచి ప్రారంభం కావడం ముఖ్యమంత్రి చంద్రబాబు నాయుడి విజన్కు నిదర్శనమన్నారు.
