రాయలసీమ న్యూస్, వై.యస్.ఆర్: అనంతపురం రిజిస్ట్రేషన్ డీఐజీ కార్యాలయం వద్ద టీడీపీ నేత జేసీ ప్రభాకర్ రెడ్డి ప్రభుత్వ అధికారులపై తీవ్ర ఆగ్రహం వ్యక్తం చేశారు. తాడిపత్రి పరిధిలో నిషేధిత భూముల రిజిస్ట్రేషన్, సబ్ రిజిస్ట్రార్ల అవినీతి ఆరోపణల నేపథ్యంలో ఆయన డీఐజీ కార్యాలయానికి వెళ్లి హల్ చల్ చేశారు.
స్టాంప్స్ అండ్ రిజిస్ట్రేషన్ డీఐజీ విజయలక్ష్మి కార్యాలయంలో జరిగిన ఈ ఘటనలో జేసీ ప్రభాకర్ రెడ్డి ఆమెపై దురుసుగా ప్రవర్తించినట్లు ప్రత్యక్ష సాక్షులు చెబుతున్నారు. మహిళా అధికారిని ఎదిరిస్తూ, వేలు చూపిస్తూ పబ్లిక్గా వార్నింగ్ ఇచ్చిన విధానం అక్కడున్నవారిలో చర్చనీయాంశమైంది.
తాడిపత్రి ప్రాంతంలో గత 22 ఏళ్లుగా నిషేధిత భూములను రిజిస్టర్ చేస్తున్నారని, దీనిపై అధికారులు ఎలాంటి చర్యలు తీసుకోవడం లేదని జేసీ ప్రభాకర్ రెడ్డి ఆరోపించారు. సబ్ రిజిస్ట్రార్లు భారీ అవినీతికి పాల్పడుతున్నారని, ఈ వ్యవహారంపై ఉన్నతాధికారులు కళ్లుమూసుకుని చూస్తున్నారని ఆయన మండిపడ్డారు.
నిషేధిత భూముల రిజిస్ట్రేషన్పై ఇప్పటివరకు ఏ చర్యలు తీసుకోలేదని ప్రశ్నిస్తూ, డీఐజీ విజయలక్ష్మిని జేసీ ప్రభాకర్ రెడ్డి రుసరుసలాడినట్లు సమాచారం. తాడిపత్రిలో జరుగుతున్న అక్రమ రిజిస్ట్రేషన్లపై వెంటనే విచారణ జరిపి బాధ్యులపై కఠిన చర్యలు తీసుకోవాలని ఆయన డిమాండ్ చేసినట్లు పార్టీ వర్గాలు పేర్కొంటున్నాయి.
డీఐజీ కార్యాలయంలో జరిగిన ఈ వాగ్వాదం కారణంగా అక్కడ కొంతసేపు ఉద్రిక్తత నెలకొంది. జేసీ ప్రభాకర్ రెడ్డి ఆకస్మికంగా కార్యాలయానికి రావడంతో ఉద్యోగులు, ప్రజలు ఆశ్చర్యానికి గురయ్యారు. మహిళా అధికారిపై ఆయన ప్రవర్తనపై ఉద్యోగ సంఘాలు, మహిళా సంఘాలు స్పందించే అవకాశం ఉన్నట్లు తెలుస్తోంది.
తాడిపత్రి ప్రాంతంలో నిషేధిత భూముల రిజిస్ట్రేషన్, సబ్ రిజిస్ట్రార్ల అవినీతి ఆరోపణలపై సంబంధిత శాఖ నుంచి అధికారిక స్పందన రావాల్సి ఉంది. జేసీ ప్రభాకర్ రెడ్డి ఆరోపణల నేపథ్యంలో స్టాంప్స్ అండ్ రిజిస్ట్రేషన్ విభాగం అంతర్గత విచారణకు వెళ్లే అవకాశమున్నట్లు ప్రభుత్వ వర్గాలు సూచిస్తున్నాయి.
