రాయలసీమ న్యూస్, అనంతపురం: అనంతపురం నగరంలోని సర్వజనాస్పత్రిలో అర్బన్ ఎమ్మెల్యే దగ్గుపాటి ప్రసాద్ ఆకస్మిక తనిఖీ నిర్వహించారు. సోమవారం ఉదయం తొందరగానే ఆసుపత్రికి చేరుకున్న ఆయన, వివిధ విభాగాలు, వార్డులను వరుసగా పరిశీలించారు. ఇంపేషెంట్ , వుత్పషెంట్ విభాగాల్లో రోగులతో మాట్లాడి, వారికి అందుతున్న వైద్య సేవలపై వివరాలు తెలుసుకున్నారు.
వార్డుల్లో చేరిన రోగుల వద్దకు వెళ్లి, చికిత్స విధానం, వైద్యులు, సిబ్బంది స్పందన, మందుల లభ్యత, పరిశుభ్రత వంటి అంశాలపై ఎమ్మెల్యే ఆరా తీశారు. అనంతరం అన్ని ఓపీ విభాగాలను పరిశీలిస్తూ, క్యూలైన్లలో నిల్చొని ఉన్న రోగులతో మాట్లాడి వారి సమస్యలు, ఇబ్బందులు తెలుసుకున్నారు.
ఓపీ సేవల సమయంలో సంబంధిత విభాగాల హెడ్ ఆఫ్ ది డిపార్ట్మెంట్లు అందుబాటులో లేకపోవడంపై దగ్గుపాటి ప్రసాద్ అసంతృప్తి వ్యక్తం చేశారు. ఈ విషయంపై ఆసుపత్రి సూపరింటెండెంట్ను ప్రశ్నించి, కారణాలు అడిగి వివరణ కోరారు. రోగుల సేవల విషయంలో నిర్లక్ష్యం సహించబోమని స్పష్టంగా తెలియజేశారు.
ఈ సందర్భంగా ఆసుపత్రి ప్రస్తుత పరిస్థితులపై ఎమ్మెల్యే వివరాలు వెల్లడించారు. సర్వజనాస్పత్రి పడకల సామర్థ్యం, రోగుల సంఖ్య, సిబ్బంది కొరత వంటి అంశాలను ఆయన ప్రస్తావించారు.
“560 పడకల సామర్థ్యం ఉన్న సర్వజనాస్పత్రిలో ప్రస్తుతం 1200 మంది ఇన్పేషెంట్లు, రోజుకు సుమారు 2300 మంది ఓపీ రోగులు వస్తున్నారు” అని ఎమ్మెల్యే దగ్గుపాటి ప్రసాద్ తెలిపారు.
“పెరుగుతున్న రోగుల సంఖ్యకు అనుగుణంగా ప్రస్తుతం ఉన్న సిబ్బంది, సౌకర్యాలు సరిపోవడం లేదు. ఈ విషయాన్ని ఇప్పటికే ప్రభుత్వం దృష్టికి తీసుకెళ్లాం” అని ఆయన చెప్పారు.
గత వైసీపీ ప్రభుత్వ కాలంలో ప్రభుత్వ ఆసుపత్రుల అభివృద్ధిపై తగినంత శ్రద్ధ చూపలేదని దగ్గుపాటి ప్రసాద్ అభిప్రాయపడ్డారు. ప్రభుత్వ వైద్య సేవల బలోపేతం కోసం అప్పటి పాలకులు అవసరమైన చర్యలు తీసుకోలేదని ఆయన వ్యాఖ్యానించారు.
“కూటమి ప్రభుత్వం అధికారంలోకి వచ్చిన తర్వాత ప్రభుత్వ నిధులతో పాటు CSR నిధులను వినియోగించి ఆసుపత్రిలో మదర్ మిల్క్ బ్యాంకు వంటి సౌకర్యాలను ఏర్పాటు చేశాం” అని ఎమ్మెల్యే తెలిపారు.
అనంతపురం సర్వజనాస్పత్రిలో ఏర్పాటైన మదర్ మిల్క్ బ్యాంకు ద్వారా శిశువులకు అవసరమైన తల్లిపాలు అందించే వ్యవస్థను బలోపేతం చేస్తున్నట్లు ఆయన వివరించారు. భవిష్యత్తులో మరిన్ని సౌకర్యాలు, అదనపు సిబ్బంది నియామకం కోసం ప్రభుత్వం చర్యలు తీసుకుంటుందని దగ్గుపాటి ప్రసాద్ పేర్కొన్నారు.
ఎమ్మెల్యే ఆకస్మిక తనిఖీ సందర్భంగా ఆసుపత్రి సూపరింటెండెంట్, వైద్యులు, సిబ్బంది హాజరై వివిధ విభాగాల పనితీరుపై వివరాలు అందించారు. రోగుల సేవల మెరుగుదల కోసం అవసరమైన సూచనలు ఎమ్మెల్యే ఇచ్చినట్లు ఆసుపత్రి వర్గాలు తెలిపాయి.
