రాయలసీమ న్యూస్, అనంతపురం: శింగనమల, చెన్నేకొత్తపల్లి సబ్ రిజిస్ట్రార్ కార్యాలయాల్లో విధుల్లో నిర్లక్ష్యంగా వ్యవహరించిన ఇద్దరు ఉద్యోగులను సస్పెండ్ చేసినట్లు సమాచారం. భూముల రిజిస్ట్రేషన్లో జరిగిన లోపాలపై వచ్చిన ఫిర్యాదుల నేపథ్యంలో ఈ చర్య తీసుకున్నట్లు అధికార వర్గాలు తెలిపాయి.
నార్పల మండలం చామలూరు గ్రామ పరిధిలోని సర్వే నంబర్లు 374, 377-3, 378, 385, 386లకు సంబంధించిన భూముల రిజిస్ట్రేషన్ వ్యవహారంలో అవకతవకలు జరిగినట్లు ఆరోపణలు వెలువడ్డాయి. ఈ భూముల వివరాలను వెబ్ ల్యాండ్ వ్యవస్థలో పేర్లు మార్చి రిజిస్ట్రేషన్ చేసినట్లు ఆరోపణలు ఉన్నాయి.
ఈ వ్యవహారంలో గురునాథ్, చెన్నేకొత్తపల్లి సబ్ రిజిస్ట్రార్ కార్యాలయంలో సీనియర్ అసిస్టెంట్గా పనిచేస్తున్న అనిల్ కుమార్లపై ఆరోపణలు నమోదయ్యాయి. వీరు విధుల్లో నిర్లక్ష్యంగా వ్యవహరించడంతో పాటు భూముల రికార్డుల్లో మార్పులు చేసి రిజిస్ట్రేషన్ ప్రక్రియను పూర్తి చేసినట్లు ప్రాథమికంగా తేలినట్లు తెలుస్తోంది.
ఈ అంశంపై ఉన్నతాధికారులు నివేదికలు సేకరించి పరిశీలించిన అనంతరం ఇద్దరు ఉద్యోగులపై క్రమశిక్షణాత్మక చర్యలు ప్రారంభించారు. తదనంతరం డీఐజీ విజయలక్ష్మి ఆదేశాల మేరకు గురునాథ్, అనిల్ కుమార్లను సస్పెండ్ చేసినట్లు సంబంధిత వర్గాలు వెల్లడించాయి.
భూముల రిజిస్ట్రేషన్ వ్యవహారాల్లో పారదర్శకతకు భంగం కలిగించే విధంగా ఏ విధమైన చర్యలు జరిగినా కఠినంగా వ్యవహరిస్తామని రెవెన్యూ శాఖ ఇప్పటికే స్పష్టం చేసిన విషయం తెలిసిందే. ఈ నేపథ్యంలో శింగనమల, చెన్నేకొత్తపల్లి సబ్ రిజిస్ట్రార్ కార్యాలయాల్లో వెలుగులోకి వచ్చిన ఈ ఘటనపై స్థానికంగా చర్చనీయాంశంగా మారింది.
సస్పెండ్ అయిన ఇద్దరు ఉద్యోగులపై తదుపరి విచారణ కొనసాగుతున్నట్లు సమాచారం. విచారణ నివేదికల ఆధారంగా మరిన్ని చర్యలు తీసుకునే అవకాశమున్నట్లు అధికార వర్గాలు సూచిస్తున్నాయి.
