రాయలసీమ న్యూస్, అన్నమయ్య: రాయలసీమ హార్టికల్చర్ హబ్ ప్రాజెక్టుకు అక్టోబర్ 2న శంకుస్థాపన జరగనుంది. అన్నమయ్య జిల్లా మదనపల్లెలో ఈ కార్యక్రమాన్ని నిర్వహించేందుకు ప్రభుత్వం ఏర్పాట్లు చేస్తోంది. కేంద్రమంత్రి నిర్మాలా సీతారామన్, ముఖ్యమంత్రి చంద్రబాబు నాయుడు కలిసి ఈ హార్టికల్చర్ హబ్కు శంకుస్థాపన చేయనున్నారు.
కేంద్ర ప్రభుత్వం పూర్వోదయ పథకం కింద రాయలసీమ హార్టికల్చర్ హబ్ ప్రాజెక్టుకు సుమారు రూ.40 వేల కోట్లు వివిధ రూపాల్లో మంజూరు చేయనుంది. అదనంగా మరో రూ.60 వేల కోట్లు ప్రైవేటు పెట్టుబడుల రూపంలో రానున్నాయి. మొత్తం రూ.లక్ష కోట్ల పెట్టుబడులతో ఈ ప్రాజెక్టు అమలు కానుంది.
రాయలసీమలోని నాలుగు ఉమ్మడి జిల్లాలతో పాటు ప్రకాశం, నెల్లూరు జిల్లాల్లో కూడా ఈ హార్టికల్చర్ హబ్ ప్రాజెక్టు ప్రయోజనాలు అందేలా ప్రభుత్వం ప్రణాళికలు సిద్ధం చేసింది. ముఖ్యమంత్రి చంద్రబాబు నాయుడు నిరంతర కృషి, కేంద్రంతో సమన్వయంతో ఈ ప్రాజెక్టును సాధించినట్లు ప్రభుత్వ వర్గాలు పేర్కొంటున్నాయి.
కరువు పీడిత ప్రాంతాల్లో హార్టికల్చర్ రంగాన్ని ప్రోత్సహించేందుకు ఈ హబ్ కీలకంగా మారనుందని భావిస్తున్నారు. ఒకవైపు సాగునీటి ప్రాజెక్టులు పూర్తి చేసి సాగునీరు అందిస్తున్న ప్రభుత్వం, మరోవైపు హార్టికల్చర్ను ప్రోత్సహించడం ద్వారా ఆ ప్రాంతాల్లో సంపద పెరగడం, రైతుల ఆదాయం పెరగడం లక్ష్యంగా ఈ కార్యక్రమాన్ని చేపడుతోంది.
మదనపల్లెలో జరిగే హార్టికల్చర్ హబ్ శంకుస్థాపన కార్యక్రమంతో పాటు ‘ఇండియన్ స్కూల్ ఆఫ్ అగ్రికల్చర్’కు కూడా శంకుస్థాపన చేయనున్నారు. వ్యవసాయ రంగంలో అత్యున్నత ప్రమాణాలతో ఏర్పడనున్న ఈ అగ్రికల్చర్ స్కూల్ను రిలయన్స్ సంస్థ ఏర్పాటు చేయనుంది.
సీఎం చంద్రబాబు వరుస కార్యక్రమాలు, పర్యటనలు
ఈ నెల 29వ తేదీ నుంచి ఐదు రోజుల పాటు ముఖ్యమంత్రి చంద్రబాబు నాయుడు వరుస కార్యక్రమాలు, పర్యటనల్లో పాల్గొననున్నారు. సెప్టెంబర్ 29వ తేదీ ఉదయం విజయవాడలో కర్మయోగి మిషన్ కార్యక్రమంలో సీఎం పాల్గొంటారు. అదే రోజు మధ్యాహ్నం నెల్లూరు జిల్లా ఉదయగిరిలో జరిగే పల్లె పండుగ కార్యక్రమానికి హాజరవుతారు.
సెప్టెంబర్ 30వ తేదీ విజయవాడలో ఇళ్ల పట్టాల పంపిణీ కార్యక్రమంలో ముఖ్యమంత్రి పాల్గొననున్నారు. ఈ సందర్భంగా 24 వేల మందికి ఇళ్ల పట్టాలు ఇవ్వనున్నారు. అక్టోబర్ 1వ తేదీ ‘పేదల సేవలో’ కార్యక్రమంలో పాల్గొని పింఛన్లు పంపిణీ చేయనున్నారు.
అక్టోబర్ 2వ తేదీ మదనపల్లెలో హార్టికల్చర్ హబ్ శంకుస్థాపన అనంతరం ‘స్వర్ణాంధ్ర–స్వచ్ఛాంధ్ర’ కార్యక్రమంలో సీఎం పాల్గొంటారు. అదే రోజు గాంధీ జయంతి సందర్భంగా నిర్వహించే వార్షిక స్వచ్ఛాంధ్ర కార్యక్రమంలో విజయవాడలో పాల్గొననున్నారు.
అక్టోబర్ 3వ తేదీ విజయవాడలో జరగనున్న Pan IIT సదస్సులో కూడా ముఖ్యమంత్రి చంద్రబాబు నాయుడు పాల్గొననున్నారు. వరుసగా జరిగే ఈ కార్యక్రమాలన్నింటికీ సంబంధించి అధికార యంత్రాంగం ఏర్పాట్లు వేగవంతం చేసింది.
