రాయలసీమ న్యూస్, అన్నమయ్య:
రోడ్డు ప్రమాదాలు తగ్గాలంటే ట్రాఫిక్ నిబంధనలు తప్పనిసరి: మదనపల్లె ట్రాఫిక్ సీఐ చాంద్ బాషా
మదనపల్లె: రోడ్డు భద్రత కోసం ప్రతి ఒక్కరూ ట్రాఫిక్ నిబంధనలను కచ్చితంగా పాటించాలని మదనపల్లె ట్రాఫిక్ సీఐ చాంద్ బాషా సూచించారు. ఆదివారం మదనపల్లె శ్రీకృష్ణ కన్వెన్షన్ హాల్లో కళాశాల విద్యార్థులకు రోడ్డు భద్రత, ట్రాఫిక్ నిబంధనలపై అవగాహన కార్యక్రమం నిర్వహించారు. ఈ కార్యక్రమంలో ట్రాఫిక్ సిబ్బంది పాల్గొన్నారు.
కార్యక్రమంలో సీఐ చాంద్ బాషా విద్యార్థులకు రోడ్డు ప్రమాదాల కారణాలు, వాటి నివారణకు తీసుకోవాల్సిన జాగ్రత్తలపై వివరించారు. ముఖ్యంగా ద్విచక్ర వాహనదారులు నిర్లక్ష్యంగా వాహనాలు నడపడం, హెల్మెట్ ఉపయోగించకపోవడం వల్ల తీవ్రమైన ప్రమాదాలు జరుగుతున్నాయని తెలిపారు.
ద్విచక్ర వాహనదారులు హెల్మెట్ తప్పనిసరిగా ధరించాలని, అతివేగంగా, నిర్లక్ష్యంగా వాహనాలు నడపకూడదని సీఐ సూచించారు. ట్రాఫిక్ సిగ్నల్స్ను గౌరవిస్తూ, జీబ్రా క్రాసింగ్, స్పీడ్ బ్రేకర్ల వద్ద జాగ్రత్తగా వాహనాలు నడపాలని విద్యార్థులకు వివరించారు.
వాహనాలకు చెల్లుబాటయ్యే ఇన్సూరెన్స్ తప్పనిసరిగా ఉండాలని, ద్విచక్ర, నాలుగు చక్రాల వాహనాలు నడిపే ప్రతి ఒక్కరూ డ్రైవింగ్ లైసెన్స్ కలిగి ఉండాలని చాంద్ బాషా సూచించారు. లైసెన్స్ లేకుండా వాహనాలు నడపడం చట్టవిరుద్ధమని, ఇలాంటి చర్యలు తమ భద్రతకే కాకుండా ఇతరుల ప్రాణాలకు కూడా ముప్పు కలిగిస్తాయని చెప్పారు.
వాహనం నడుపుతున్న సమయంలో మొబైల్ ఫోన్ వినియోగించడం ప్రమాదకరమని సీఐ చాంద్ బాషా హెచ్చరించారు. సెల్ఫోన్ మాట్లాడుతూ డ్రైవింగ్ చేయడం వల్ల దృష్టి చెదిరి ప్రమాదాలు జరుగుతున్నాయని, అలాంటి అలవాట్లను పూర్తిగా మానుకోవాలని విద్యార్థులకు సూచించారు.
ట్రాఫిక్ నిబంధనలను కచ్చితంగా పాటించడం ద్వారా రోడ్డు ప్రమాదాలను గణనీయంగా తగ్గించవచ్చని సీఐ చాంద్ బాషా అభిప్రాయపడ్డారు. ప్రతి ఒక్కరూ బాధ్యతగా వ్యవహరించి రోడ్డు భద్రతకు సహకరించాలని ఆయన కోరారు. యువతలో అవగాహన పెంచేందుకు ఇలాంటి కార్యక్రమాలను ట్రాఫిక్ విభాగం కొనసాగిస్తుందని ట్రాఫిక్ సిబ్బంది తెలిపారు.
