రాయలసీమ న్యూస్, అన్నమయ్య: రాయచోటి నియోజకవర్గంలో శనివారం నిర్వహించనున్న ‘ప్రజా చేరువ’ కార్యక్రమం ఏర్పాట్లను ఆంధ్రప్రదేశ్ రాష్ట్ర రవాణా, యువజన మరియు క్రీడాశాఖల మంత్రి మండిపల్లి రాంప్రసాద్ రెడ్డి పరిశీలించారు. రాయచోటి స్టేట్ గెస్ట్ హౌస్లో జరుగనున్న ఈ కార్యక్రమంలో రాష్ట్ర మంత్రులు బీసీ జనార్దన్ రెడ్డి, గొట్టిపాటి రవికుమార్, మండిపల్లి రాంప్రసాద్ రెడ్డి పాల్గొననున్నారు.
ఈ నేపథ్యంలో స్టేట్ గెస్ట్ హౌస్ ప్రాంగణంలో చేపట్టిన ఏర్పాట్లను మంత్రి మండిపల్లి రాంప్రసాద్ రెడ్డి ప్రత్యక్షంగా పరిశీలించారు. ఆయనతో పాటు ఆయన సోదరుడు డాక్టర్ మండిపల్లి లక్ష్మీ ప్రసాద్ రెడ్డి కూడా గెస్ట్ హౌస్ పరిసరాలను, సమావేశాల కోసం సిద్ధం చేసిన వేదికలను, ఇతర సౌకర్యాలను పరిశీలించారు.
కార్యక్రమం సందర్భంగా నిర్వహించనున్న సమావేశాల ఏర్పాట్లు, అతిథుల రాకపోకలు, ప్రజల రాకను దృష్టిలో ఉంచుకుని సంబంధిత అధికారులతో మంత్రి సూచనలు చేశారు. ముఖ్యంగా ప్రజలు, కూటమి పార్టీ నాయకులు, కార్యకర్తలకు ఎలాంటి ఇబ్బందులు కలగకుండా అవసరమైన అన్ని సదుపాయాలు కల్పించాలని సంబంధిత సిబ్బందికి ఆదేశాలు జారీ చేసినట్లు సమాచారం.
ప్రజల రాకను దృష్టిలో ఉంచుకుని పార్కింగ్, తాగునీరు, కూర్చునే సదుపాయాలు, భద్రతా ఏర్పాట్లు వంటి అంశాలపై మంత్రి ప్రత్యేకంగా విచారించారు. కార్యక్రమం సమయంలో ఎలాంటి అంతరాయం లేకుండా, సమయపాలనతో కార్యక్రమాలు సాగేందుకు అధికారులను ఆదేశించినట్లు అధికార వర్గాలు తెలిపాయి.
శనివారం ‘ప్రజా చేరువ’ కార్యక్రమాన్ని విజయవంతంగా నిర్వహించేందుకు అవసరమైన అన్ని ఏర్పాట్లు దాదాపు పూర్తయ్యాయని అధికారులు పేర్కొన్నారు. మిగిలిన చిన్నపాటి పనులను కూడా రాత్రి వరకు పూర్తి చేసి, కార్యక్రమం ప్రారంభానికి ముందే అన్ని ఏర్పాట్లు సిద్ధంగా ఉంచేలా చర్యలు తీసుకుంటున్నట్లు తెలిపారు.
