రాయలసీమ న్యూస్, అన్నమయ్య: అన్నమయ్య జిల్లా పెద్దతిప్పసముద్రం మండలంలో వంటగ్యాస్ సమస్యలు మళ్లీ తలెత్తి స్థానికులకు తీవ్ర ఇబ్బందులు కలిగిస్తున్నాయి. బి కొత్తకోట పట్టణంలోని పిటియం రోడ్డులో గురువారం ఉద్రిక్తత నెలకొంది. ఇండియన్ గ్యాస్ ఏజెన్సీ యాజమాన్యం నిర్లక్ష్య వైఖరి కొనసాగుతుండడంతో లబ్ధిదారులు ఆగ్రహం వ్యక్తం చేశారు.
లబ్ధిదారులు చెబుతున్న వివరాల ప్రకారం, ఎంతసార్లు గ్యాస్ సిలిండర్లు బుక్ చేసుకున్నా, బుకింగ్లు రద్దు చేసి తమకు సిలిండర్లు ఇవ్వడం లేదని ఆరోపిస్తున్నారు. దీంతో కుటుంబాల రోజువారీ వంట పనులు తీవ్రంగా దెబ్బతింటున్నాయని వారు మండిపడుతున్నారు.
స్థానికుల వాదన ప్రకారం పట్టణంలో కొంతమంది దుకాణదారులకు మాత్రం బ్లాక్లో సిలిండర్లు అమ్ముకుంటూ, అసలు లబ్ధిదారులకు సరఫరా చేయడం లేదని ఆరోపణలు వినిపిస్తున్నాయి. ఈ నేపథ్యంలో పిటియం రోడ్డుపై లబ్ధిదారులు, స్థానికులు బైఠాయించి నిరసన తెలిపారు. ఏజెన్సీ ఎదుట రహదారిపై కూర్చొని తమ డిమాండ్లను వినిపించారు.
ఇండియన్ గ్యాస్ యాజమాన్యం నిర్లక్ష్య ధోరణి మారకపోవడంపై ప్రజలు ఆగ్రహం వ్యక్తం చేస్తున్నారు. నెల క్రితం సంబంధిత శాఖ అధికారులు ఇండియన్ గ్యాస్ ఏజెన్సీని తనిఖీలు నిర్వహించి సీజ్ చేసిన విషయం తెలిసిందే. అనంతరం కొన్ని నిబంధనలతో తిరిగి పునఃప్రారంభానికి అనుమతి లభించినా, యాజమాన్యం తీరులో మార్పు కనిపించడం లేదని లబ్ధిదారులు ఆరోపిస్తున్నారు.
బుకింగ్లు రద్దు కావడం, సిలిండర్లు సమయానికి అందకపోవడం, బ్లాక్ మార్కెట్ ఆరోపణలపై సంబంధిత శాఖ అధికారులు మళ్లీ జోక్యం చేసుకోవాలని స్థానికులు డిమాండ్ చేస్తున్నారు. గ్యాస్ సరఫరా వ్యవస్థను పారదర్శకంగా నిర్వహించేలా కఠిన చర్యలు తీసుకోవాలని, లబ్ధిదారుల వివరాలు, బుకింగ్ల స్థితి ప్రజలకు బహిర్గతం చేయాలని కోరుతున్నారు.
వంటగ్యాస్ సరఫరా లోపం కారణంగా పేద, మధ్యతరగతి కుటుంబాలు ఎక్కువగా ఇబ్బందులు పడుతున్నాయని, సమస్యను తక్షణమే పరిష్కరించకపోతే ఆందోళనలను మరింత తీవ్రతరం చేస్తామని కొందరు లబ్ధిదారులు హెచ్చరిస్తున్నారు. పెద్దతిప్పసముద్రం మండలంలో వంటగ్యాస్ సంక్షోభంపై జిల్లా అధికారుల స్పందన కోసం ప్రజలు ఎదురుచూస్తున్నారు.
