రాయలసీమ న్యూస్, నంద్యాల: నంద్యాల: రెడ్‌క్రాస్ సొసైటీ సేవలను మరింత విస్తృతం చేసి, అత్యవసర పరిస్థితుల్లో ప్రజలకు రక్తం సులభంగా అందుబాటులో ఉండేలా విస్తృతంగా రక్తదాన శిబిరాలు నిర్వహించాలని జిల్లా కలెక్టర్ జి. రాజకుమారి సూచించారు. రెవెన్యూ శాఖ అధికారులు, సిబ్బంది రెడ్‌క్రాస్‌లో సభ్యత్వం తీసుకుని సేవా కార్యక్రమాల్లో స్వచ్ఛందంగా భాగస్వాములు కావాలని ఆమె కోరారు.
రెడ్‌క్రాస్ సేవలకు గాను గవర్నర్ చేతుల మీదుగా బంగారు పతకం, ప్రశంసా పత్రం అందుకున్న కలెక్టర్ జి. రాజకుమారిని గురువారం కలెక్టరేట్‌లో జాయింట్ కలెక్టర్ సూరజ్ ధనుంజయ్, డీఆర్వో రాము నాయక్‌తో పాటు రెవెన్యూ సిబ్బంది అభినందించారు. ఈ సందర్భంగా రెవెన్యూ విభాగం అధికారులు, సిబ్బంది కలెక్టర్‌కు శుభాకాంక్షలు తెలియజేశారు.
కలెక్టర్ జి. రాజకుమారి మాట్లాడుతూ రక్తదాన ప్రాముఖ్యతను వివరించారు. రక్తదానం ప్రాణదానంతో సమానమని ఆమె పేర్కొన్నారు. యువత, మహిళల్లో రక్తదానంపై అవగాహన పెంచాల్సిన అవసరం ఉందని సూచించారు. ప్రతి మూడు నెలలకు ఒకసారి రక్తదానం చేసేలా ప్రజలను ప్రోత్సహించేందుకు చర్యలు తీసుకోవాలని సంబంధిత అధికారులకు సూచించారు.
ప్రభుత్వ శాఖలు, స్వచ్ఛంద సంస్థలు, యువజన సంఘాలు, మహిళా సంఘాల సమన్వయంతో రక్తదాన శిబిరాలను విస్తృతంగా నిర్వహించాలనే అవసరాన్ని కలెక్టర్ ఎత్తిచూపారు. గ్రామీణ, పట్టణ ప్రాంతాల్లో సమానంగా రక్తదాన కార్యక్రమాలు జరిగేలా ప్రణాళికలు రూపొందించాలని సూచించారు.
రెడ్‌క్రాస్ సొసైటీ ద్వారా ఇప్పటికే జరుగుతున్న సేవా కార్యక్రమాలను మరింత బలోపేతం చేయాలని, అత్యవసర సమయాల్లో రక్తం కొరత తలెత్తకుండా ముందస్తు ఏర్పాట్లు చేసుకోవాలని కలెక్టర్ సూచించారు. ఈ దిశగా రెవెన్యూ శాఖతో పాటు ఇతర ప్రభుత్వ శాఖల సిబ్బంది కూడా ముందుకు రావాలని ఆమె అభిప్రాయపడ్డారు.
