రాయలసీమ న్యూస్, నంద్యాల: నంద్యాల: విజయ పాల డైరీ వద్ద శుక్రవారం ఉద్రిక్తత వాతావరణం నెలకొంది. డైరీ డైరెక్టర్ల ఎన్నికల నామినేషన్ల స్వీకరణ సందర్భంగా నామినేషన్ ప్రక్రియ సక్రమంగా జరగడంలేదని ఆళ్ళగడ్డ టీడీపీ ఎమ్మెల్యే, మాజీ మంత్రి భూమా అఖిలప్రియ వర్గం నిరసనకు దిగింది. దీంతో డైరీ పరిసరాల్లో పరిస్థితి ఉత్కంఠభరితంగా మారింది.
నంద్యాల విజయ మిల్క్ డైరీలో ఖాళీగా ఉన్న మూడు డైరెక్టర్ల పదవులకు ఎన్నికలు జరగనున్నాయి. ఈ ఎన్నికల నిమిత్తం శుక్రవారం నామినేషన్ల స్వీకరణను డైరీ యాజమాన్యం ప్రారంభించింది. అయితే నామినేషన్ ప్రక్రియ పారదర్శకంగా, నిబంధనలకు అనుగుణంగా జరగడంలేదని భూమా అఖిలప్రియ అనుచరులు ఆరోపిస్తూ డైరీ వద్దకు చేరుకున్నారు.
డైరీ సొసైటీ అధ్యక్షుడిగా ఉన్న భూమా జగత్ విఖ్యాత్ రెడ్డిపై పాలకవర్గం ఇటీవల అనర్హత వేటు వేసింది. అధ్యక్ష పదవి నుంచి ఆయనను తొలగించడంతో పాటు సస్పెన్షన్ ఆదేశాలు కూడా జారీ చేసింది. ఈ నిర్ణయాలపై న్యాయం కోసం భూమా జగత్ విఖ్యాత్ రెడ్డి హైకోర్టును ఆశ్రయించారు. పాలకవర్గం విధించిన అనర్హత వేటును సస్పెండ్ చేయాలని కోర్టులో విజ్ఞప్తి చేశారు.
ఈ పరిణామాల నేపథ్యంలో విజయ పాల డైరీ నామినేషన్ల ప్రక్రియపై రాజకీయ వాతావరణం మరింత వేడెక్కింది. భూమా అఖిలప్రియ వర్గం నిరసన తెలుపుతూ డైరీ గేట్లు తెరుచుకుని లోపలికి ప్రవేశించేందుకు ప్రయత్నించగా, అక్కడ మోహరించిన పోలీసులు వారిని అడ్డుకున్నారు. డైరీ ప్రాంగణంలోకి ఇతరులు అనుమతి లేకుండా రావద్దని హెచ్చరించారు.
నిబంధనలు అతిక్రమించే ప్రయత్నం చేస్తే కఠిన చర్యలు తీసుకుంటామని పోలీసులు స్పష్టం చేశారు. లా అండ్ ఆర్డర్ సమస్యలు తలెత్తే అవకాశం ఉన్న నేపథ్యంలో డైరీ పరిసరాల్లో గట్టి బందోబస్తు ఏర్పాటు చేశారు. పోలీసులు, నిరసనకారుల మధ్య కొంతసేపు ఉద్రిక్తత నెలకొన్నప్పటికీ పెద్దగా అపశృతి జరగలేదు.
ఉద్రిక్తతల నేపథ్యంలో విజయ డైరీ యాజమాన్యం నామినేషన్ల ప్రక్రియను తాత్కాలికంగా నిలిపివేస్తున్నట్లు ప్రకటించింది. లా అండ్ ఆర్డర్ పరిస్థితులు సవ్యంగా ఉన్న తర్వాత కొత్త నామినేషన్ తేదీలను త్వరలో ప్రకటిస్తామని సంస్థ స్పష్టం చేసింది.
భూమా జగత్ విఖ్యాత్ రెడ్డిపై పాలకవర్గం తీసుకున్న చర్యలతో నంద్యాలలో విజయ డైరీ పాలకవర్గం వర్సెస్ విఖ్యాత్ రెడ్డి వర్గం మధ్య విభేదాలు మరింత తీవ్రమయ్యాయి. ఈ వివాదం నేపథ్యంలో జరగాల్సిన డైరెక్టర్ల ఎన్నికలు, నామినేషన్ల ప్రక్రియపై అనిశ్చితి నెలకొంది.
