రాయలసీమ న్యూస్, శ్రీ సత్యసాయి: ధర్మవరం: శ్రీ సత్యసాయి జిల్లా ధర్మవరంలో మున్సిపల్ చైర్మన్ పదవి ఎవరికి దక్కనుందన్న దానిపై కూటమి పార్టీల్లో అనిశ్చితి కొనసాగుతోంది. ధర్మవరం నియోజకవర్గానికి మంత్రి సత్యకుమార్ యాదవ్ ప్రాతినిధ్యం వహిస్తున్నారు. ఈ పట్టణంలో టీడీపీ తరఫున పరిటాల శ్రీరామ్, జనసేన తరఫున చిలకం మధుసూదన్ రెడ్డి ఇన్చార్జిలుగా వ్యవహరిస్తున్నారు.
పరిపాలన సౌలభ్యం కోసం ధర్మవరం మున్సిపాలిటీలో వార్డుల సంఖ్యను 40 నుంచి 48కి పెంచుతున్నట్టు మున్సిపల్ కమిషనర్ వెల్లడించారు. 2021 మున్సిపల్ ఎన్నికల్లో మొత్తం 40 వార్డులలో వైఎస్సార్ కాంగ్రెస్ పార్టీ అభ్యర్థులే విజయం సాధించిన విషయం తెలిసిందే.
2024 సాధారణ ఎన్నికల్లో ఓటమి అనంతరం దాదాపు సంవత్సరం పాటు మాజీ ఎమ్మెల్యే కేతిరెడ్డి వెంకట్రామిరెడ్డి పెద్దగా ప్రజల్లో కనిపించలేదు. అయితే ఇటీవలి నెలల్లో ఆయన ప్రతి కార్యక్రమానికి హాజరవుతూ పార్టీ శ్రేణుల్లో చైతన్యం నింపుతున్నట్టు స్థానిక వర్గాలు చెబుతున్నాయి. ముఖ్యంగా మెగా DSCలో అవకతవకల ఆరోపణలు, నేతన్న నేస్తం వంటి కార్యక్రమాల్లో వైఎస్సార్ కాంగ్రెస్ క్యాడర్ భారీగా పాల్గొనడం గమనార్హమైంది.
ఇక కూటమి పక్షాన చూస్తే, పరిటాల శ్రీరామ్, మంత్రి సత్యకుమార్ల మధ్య దూరం పెరుగుతోందన్న చర్చలు వినిపిస్తున్నాయి. ఈ నేపథ్యంలో మున్సిపల్ చైర్మన్ సీటు కూటమిలో ఏ పార్టీకి కేటాయిస్తారన్న దానిపై సస్పెన్స్ నెలకొంది. ధర్మవరం నుంచి మంత్రి సత్యకుమార్ ప్రాతినిధ్యం వహిస్తున్నందున చైర్మన్ పదవి తమకే రావాలని స్థానిక BJP నాయకులు వాదిస్తున్నారు. మరోవైపు బూత్ స్థాయిలో బలంగా ఉన్నది తెలుగుదేశం పార్టీనే కావడంతో ధర్మవరం మున్సిపల్ చైర్మన్ సీటు టీడీపీకి కేటాయించడమే న్యాయమని ఆ పార్టీ నాయకులు అంటున్నారు.
ఈ రెండు పార్టీల మధ్య సమన్వయం కష్టమైతే మధ్యంతర మార్గంగా జనసేన పార్టీకి చైర్మన్ పదవి ఇస్తే కూటమికి అనుకూలంగా ఉండొచ్చని కొందరు రాజకీయ విశ్లేషకులు అభిప్రాయపడుతున్నారు. ఇదిలా ఉండగా, ధర్మవరం పట్టణంలో ఇటీవల చోటుచేసుకున్న పరిణామాల నేపథ్యంలో వైఎస్సార్ కాంగ్రెస్ బలం మళ్లీ పెరుగుతోందని విశ్లేషకులు అంచనా వేస్తున్నారు.
గత వైఎస్సార్ కాంగ్రెస్ పాలనలో అమలు చేసిన సంక్షేమ పథకాలు ఆ పార్టీకి ప్లస్గా మారే అవకాశముండగా, చేనేత కార్మికులు అధికంగా ఉన్న ధర్మవరంలో నేతన్న సేవ పథకం అమలులో జరిగిన అవకతవకల ఆరోపణలు కూటమికి మైనస్గా మారవచ్చని రాజకీయ వర్గాలు భావిస్తున్నాయి.
వార్డుల సంఖ్య 48కి పెరిగినా, వైఎస్సార్ కాంగ్రెస్ నుంచి మాజీ కౌన్సిలర్లు చాలామంది మళ్లీ పోటీలో నిలబడేందుకు సిద్ధంగా ఉన్నట్టు సమాచారం. అయితే కూటమి పక్షాన సీట్ల పంపకాలపై ఇప్పటివరకు స్పష్టత రాలేదు. మున్సిపల్ ఎన్నికల నోటిఫికేషన్ తేదీ దగ్గరపడుతుండడంతో కూటమి పార్టీ స్థానిక నాయకుల్లో ఆందోళన, ఉత్కంఠ వాతావరణం నెలకొంది.
