రాయలసీమ న్యూస్, శ్రీ సత్యసాయి: అమరావతి: ఆంధ్రప్రదేశ్ వైద్య ఆరోగ్య శాఖ మంత్రి సత్యకుమార్పై 108, 104 సేవల వాహనాల ప్రారంభోత్సవం వివాదాస్పదంగా మారింది. శ్రీసత్యసాయి జిల్లా ధర్మవరం పట్టణంలో పాత అంబులెన్స్ వాహనాలకు స్టిక్కర్లు మార్చి, పెయింటింగ్ వేసి కొత్తవిగా ప్రారంభించడంపై విమర్శలు వెల్లువెత్తుతున్నాయి.
వైద్య ఆరోగ్య శాఖ ఆధ్వర్యంలో నడిచే 108 అత్యవసర సేవ వాహనాలు, 104 ఆరోగ్య సేవ వాహనాల విషయంలో ప్రభుత్వం క్రెడిట్ దోపిడీకి పాల్పడిందని ప్రతిపక్షం ఆరోపిస్తోంది. వైఎస్ జగన్ హయాంలో 2023లోనే కొనుగోలు చేసిన 71 అంబులెన్స్ వాహనాలను ఇప్పుడు కొత్తగా తెచ్చినవిగా చూపిస్తూ జెండా ఊపి ప్రారంభించారని ఆరోపణలు వినిపిస్తున్నాయి.
ధర్మవరం పట్టణంలో జరిగిన కార్యక్రమంలో 108 వాహనాలకు కొత్త స్టిక్కర్లు అతికించి, పెయింటింగ్ చేయించి, వాటిని కొత్త వాహనాల్లా ఆర్భాటంగా ప్రారంభించినట్లు స్థానికంగా చర్చ నడుస్తోంది. ఇదే విధంగా 104 సేవ వాహనాలపై కూడా పాత వాహనాలకే స్టిక్కర్లు మార్చి, వాటిని ఆరోగ్య రథాలుగా ప్రకటించినట్టు సమాచారం.
ఈ పరిణామంపై టీడీపీ కూటమి ప్రభుత్వం క్రెడిట్ చోరీకి పాల్పడుతోందని రాజకీయ వర్గాల్లో విమర్శలు వినిపిస్తున్నాయి. గత ప్రభుత్వ కాలంలోనే కొనుగోలు చేసి సేవలో ఉన్న వాహనాలను ఇప్పుడు కొత్త ప్రభుత్వ విజయంగా చూపించుకోవడం సరైంది కాదని ప్రతిపక్ష నేతలు వ్యాఖ్యానిస్తున్నారు.
ధర్మవరం పట్టణంలో మంత్రి సత్యకుమార్ హడావిడి, కార్యక్రమ నిర్వహణ, వాహనాల ప్రదర్శనపై స్థానిక ప్రజల్లోనూ, రాజకీయ వర్గాల్లోనూ చర్చ సాగుతోంది. ప్రజా ధనంతో కొనుగోలు చేసిన వాహనాల వివరాలు, కొనుగోలు తేదీలు, సేవలో ప్రవేశపెట్టిన సమయం వంటి అంశాలను ప్రభుత్వం బహిర్గతం చేయాలని డిమాండ్లు వినిపిస్తున్నాయి.
వాహనాలపై స్టిక్కర్లు మార్చడం, పెయింటింగ్ చేయడం సాధారణ పరిరక్షణ చర్యలేనని, అయితే వాటిని పూర్తిగా కొత్త వాహనాలుగా ప్రజలకు చూపించడం పారదర్శకతకు విరుద్ధమని విమర్శకులు అంటున్నారు. మరోవైపు, ఈ కార్యక్రమంపై అధికార వర్గం నుంచి అధికారిక సమాధానం కోసం ఆసక్తి నెలకొంది.
