రాయలసీమ న్యూస్, శ్రీ సత్యసాయి: శ్రీ సత్యసాయి జిల్లా గుట్టూరు గ్రామంలో బాల్య వివాహాలు, బాలలపై లైంగిక నేరాలు, మహిళల భద్రత, రహదారి ప్రమాదాల నివారణపై పోలీసు శాఖ ఆధ్వర్యంలో అవగాహన కార్యక్రమం, ర్యాలీ నిర్వహించారు. కియా ఎస్సై రాఘవయ్య నాయకత్వంలో జరిగిన ఈ కార్యక్రమంలో గ్రామ పెద్దలు, ICDS సిబ్బంది, ఆశా కార్యకర్తలు, పంచాయతీ సిబ్బంది పాల్గొన్నారు.
అవగాహన ర్యాలీ సందర్భంగా POCSO చట్టం అమలు, బాలలపై లైంగిక నేరాల నివారణకు తీసుకోవాల్సిన జాగ్రత్తలు, బాల్య వివాహాల నిరోధంపై ప్రజలకు వివరించారు. బాల్య వివాహాలు చట్ట విరుద్ధమని, ఇలాంటి వివాహాలు జరిపితే చట్టపరమైన చర్యలు తప్పవని అధికారులు స్పష్టం చేశారు.
మహిళల భద్రతకు సంబంధించి గ్రామస్థులు అప్రమత్తంగా ఉండాలని, ఏవైనా వేధింపులు, దాడులు జరిగినప్పుడు వెంటనే పోలీసులకు సమాచారం ఇవ్వాలని సూచించారు. మద్యం సేవనం వల్ల కుటుంబాలు, సమాజం ఎదుర్కొనే దుష్పరిణామాలను వివరించి, మద్యం అలవాటు నుంచి దూరంగా ఉండాలని ప్రజలను కోరారు.
ఆస్తి నేరాల నివారణకు గ్రామాల్లో అప్రమత్తత అవసరమని, అనుమానాస్పద వ్యక్తులు, కదలికలు కనిపించినప్పుడు వెంటనే పోలీసులకు తెలియజేయాలని సూచించారు. ఇళ్లలో, వ్యాపార సంస్థల్లో CC కెమెరాలు ఏర్పాటు చేయడం ద్వారా నేరాల నియంత్రణకు, విచారణకు పెద్దగా ఉపయోగపడుతుందని అధికారులు వివరించారు.
బైండోవర్ నిబంధనలు ఉల్లంఘించినప్పుడు ఎదురయ్యే చట్టపరమైన పరిణామాలను కూడా ప్రజలకు తెలియజేశారు. చట్టాన్ని ఉల్లంఘించే చర్యలకు పాల్పడితే కఠినమైన శిక్షలు తప్పవని, శాంతి భద్రతల పరిరక్షణలో ప్రతి పౌరుడు బాధ్యతగా వ్యవహరించాలని సూచించారు.
రాబోయే వినాయక చవితి పండుగను శాంతియుతంగా, సురక్షితంగా నిర్వహించుకోవాలని అధికారులు గ్రామస్థులను కోరారు. పండుగ సందర్భంగా పోలీసులకు ప్రజలు పూర్తి స్థాయిలో సహకరించాలని, నియమాలు, నిబంధనలు పాటిస్తూ వేడుకలు జరుపుకోవాలని సూచించారు.
