రాయలసీమ న్యూస్, శ్రీ సత్యసాయి: హిందూపురం:- వ్యాపార లావాదేవీల నిర్వహణలో కీలకంగా ఉండాల్సిన మార్కెటింగ్ శాఖ, పెట్రోల్ బంకుల ఏర్పాటు విషయంలో వెనక్కి తగ్గింది. అన్ని వనరులు, అవకాశాలు ఉన్నప్పటికీ బంకుల నిర్వహణ తమ వల్ల కాదని స్పష్టం చేయడంతో, ప్రభుత్వ స్థాయిలో ముందుకు వచ్చిన ప్రణాళిక నిలిచిపోయింది.
ఉమ్మడి జిల్లాలో మార్కెటింగ్ శాఖకు పట్టణ ప్రాంతాల్లో, వాటి పరిసరాల్లో అనేక స్థలాలు ఉన్నాయి. కొన్ని చోట్ల ఈ భూములు పట్టణాల అంచుల్లో ఉండగా, మరికొన్ని ప్రాంతాల్లో పట్టణాల నడిబొడ్డునే ఉన్నాయి. ఆదాయాన్ని పెంచుకునే దిశగా ఈ స్థలాలను వినియోగించుకోవాలని ప్రభుత్వం 2021లో నిర్ణయించింది. ఆ లక్ష్యంతో మార్కెటింగ్ శాఖ ఆధ్వర్యంలో పెట్రోల్ బంకులు ఏర్పాటు చేయాలని ఆలోచన ముందుకు వచ్చింది.
ఈ నేపథ్యంలో సంబంధిత శాఖ అధికారులు ప్రతిపాదనలు సిద్ధం చేశారు. ఎక్కడెక్కడ పెట్రోల్ బంకులు ఏర్పాటు చేయడానికి అనుకూల పరిస్థితులున్నాయో గుర్తించి, ఆ మేరకు నివేదికలు రూపొందించారు. అనంతరం ఆయా స్థలాలను ఆయిల్ కంపెనీల ప్రతినిధులు ప్రత్యక్షంగా పరిశీలించారు. స్థలాల స్థానం, రహదారి అనుసంధానం, భవిష్యత్ వాణిజ్యావకాశాలు వంటి అంశాలను వారు పరిశీలించినట్లు సమాచారం.
అయితే తదుపరి దశలో సమస్య తలెత్తింది. పెట్రోల్ బంకుల నిర్వహణ తమ శాఖకు సాధ్యం కాదని మార్కెటింగ్ శాఖ అధికారులు స్పష్టం చేశారు. బంకుల నిర్వహణకు అవసరమైన సిబ్బంది, సాంకేతిక నైపుణ్యం, రోజువారీ కార్యకలాపాల పర్యవేక్షణ వంటి అంశాలను కారణాలుగా చూపుతూ వారు వెనక్కి తగ్గినట్లు తెలిసింది. దీంతో పెట్రోల్ బంకుల ఏర్పాటు ప్రతిపాదన అమలు దశకు వెళ్లకుండానే అటకెక్కిపోయింది.
ఇక మరోవైపు, శాంతిభద్రతల పర్యవేక్షణ, ఖైదీల సంరక్షణ వంటి తమ ప్రాథమిక బాధ్యతలతో పాటు, పోలీస్ శాఖ, జైళ్ల శాఖలు పెట్రోల్ బంకుల నిర్వహణలో సమర్థతను చూపుతున్నాయి. పోలీస్ శాఖ అనంతపురం, హిందూపురంలో పెట్రోల్ బంకులను విజయవంతంగా నడుపుతోంది. అదే విధంగా జైళ్ల శాఖ పెనుకొండలో ఏర్పాటు చేసిన పెట్రోల్ బంకును లాభదాయకంగా నిర్వహిస్తోంది.
మార్కెటింగ్ శాఖ మాత్రం తాము నిర్వహణ బాధ్యతలు చేపట్టలేమని వెనక్కి తగ్గిన నేపథ్యంలో, ప్రభుత్వానికి ఈ స్థలాల వినియోగంపై మరోసారి ఆలోచించాల్సిన అవసరం ఏర్పడింది. ఇప్పటికే ఇతర శాఖలు సమర్థంగా బంకులు నడుపుతున్న దృష్ట్యా, మార్కెటింగ్ శాఖ భూముల వినియోగంపై తదుపరి నిర్ణయాల కోసం ఆసక్తి నెలకొంది.
