రాయలసీమ న్యూస్, శ్రీ సత్యసాయి: శ్రీ సత్యసాయి జిల్లా హిందూపురం పట్టణంలో పోలీసులపై దాడి చేయడానికి ప్రయత్నించిన దొంగల ముఠాను పోలీసులు అరెస్ట్ చేశారు. హిందూపురం టౌన్ పోలీసు స్టేషన్ పరిధిలో గత నెలలో జరిగిన రెండు ఘటనల నేపథ్యంలో ఈ ముఠాను గుర్తించి పట్టుకున్నట్లు సమాచారం.
పోలీసుల వివరాల ప్రకారం, గత నెల 6వ తేదీ అర్ధరాత్రి హిందూపురం పట్టణంలో నంబరు లేని బొలెరో వాహనం సంచరిస్తుండగా, నైట్ రౌండ్లో ఉన్న పోలీసులు అనుమానం చెంది వెంటపడ్డారు. వెంటపడుతున్న పోలీసు వాహనాన్ని ఆ ముఠా సభ్యులు Boleroతో ఢీకొట్టినట్లు పోలీసులు తెలిపారు.
తర్వాత అదే నెల 28వ తేదీన ఈ ముఠా సభ్యుల్లో కొందరు మరో వాహనంలో హిందూపురానికి తిరిగి వచ్చినట్లు పోలీసులు గుర్తించారు. నైట్ రౌండ్లో ఉన్న సిబ్బందికి అనుమానం రావడంతో వాహనాన్ని అడ్డుకోవడానికి ప్రయత్నించగా, వారు అక్కడి నుంచి పారిపోయారు. వెంటనే పోలీసులు అప్రమత్తమై, వాహనం వెళ్లే మార్గంలో మోహరించి వెంబడించారు.
ఈ క్రమంలో ముఠా సభ్యులు వాహనాన్ని పోలీసులపై ఎక్కించేందుకు ప్రయత్నించినట్లు సమాచారం. హిందూపురం నుంచి కర్ణాటక రాష్ట్రంలోని Pavagada వరకు పోలీసులు వాహనాన్ని వెంబడించారు. అక్కడి నుంచి తిరిగి పరిగి మండల పరిధిలోకి వచ్చిన సమయంలో వారిని అదుపులోకి తీసుకునే ప్రయత్నంలో పోలీసులు మూడు రౌండ్లు కాల్పులు జరిపినట్లు తెలుస్తోంది. అయినప్పటికీ ఆ సమయంలో ముఠా సభ్యులు అక్కడి నుంచి తప్పించుకుని వెళ్లిపోయారు.
తరువాత జరిగిన దర్యాప్తు, గాలింపు చర్యల ద్వారా ఈ ముఠా సభ్యులను పోలీసులు గుర్తించి అరెస్ట్ చేశారు. పట్టుబడిన ముఠా సభ్యులకు పోలీస్ మార్క కౌన్సిలింగ్ నిర్వహించినట్లు అధికార వర్గాలు పేర్కొన్నాయి. అనంతరం వారిని హిందూపురం పట్టణంలో నడిపించుకుని కోర్టుకు తీసుకెళ్లి హాజరుపరిచారు.
పోలీసులపై దాడి యత్నం, వాహనంతో ఢీకొట్టడం, వాహనం ఎక్కించేందుకు ప్రయత్నించడం వంటి అంశాలపై సంబంధిత కేసులు నమోదు చేసి, ముఠా కార్యకలాపాలపై మరింత దర్యాప్తు కొనసాగిస్తున్నట్లు సమాచారం. పట్టణంలో ఇటువంటి సంఘటనలు పునరావృతం కాకుండా నైట్ రౌండ్లు, చెక్పోస్టులు, వాహనాల తనిఖీలను మరింత కట్టుదిట్టం చేసినట్లు పోలీసు వర్గాలు వెల్లడించాయి.
