రాయలసీమ న్యూస్, శ్రీ సత్యసాయి: కదిరి టౌన్: సత్యసాయి జిల్లా కదిరి టౌన్ పోలీస్ స్టేషన్ పరిధిలోని శివాలయంలో జరిగిన హుండీ దొంగతనం కేసులో నిందితుడైన మేకల నరసింహను కదిరి పోలీసులు ఈ నెల 21వ తేదీన అరెస్ట్ చేసి, రిమాండ్ నిమిత్తం స్థానిక పోలీస్ స్టేషన్కు తీసుకువచ్చారు. శివాలయంలో హుండీ దొంగతనం కేసు నమోదు అయిన నేపథ్యంలో నిందితుడిని విచారణ కోసం పోలీస్ స్టేషన్లో కస్టడీలో ఉంచారు.
అయితే అదే రోజు మధ్యాహ్నం సుమారు 3 గంటల సమయంలో కస్టడీలో ఉన్న మేకల నరసింహ ఒక్కసారిగా పోలీస్ స్టేషన్ నుండి బయటకు పరుగెత్తి, కాంపౌండ్ గోడను దూకి సమీపంలోని ప్రభుత్వ ఆసుపత్రి ప్రాంగణంలోకి ప్రవేశించాడు. అక్కడి నుండి మరింత దూరం పారిపోవడంతో విధుల్లో ఉన్న పోలీసు సిబ్బంది వెంటనే వెంబడించినప్పటికీ అతడిని అదుపులోకి తీసుకోలేకపోయారు. దీంతో నిందితుడు పోలీస్ కస్టడీ నుండి తప్పించుకుని పరారయ్యాడు.
ఈ ఘటనపై విధుల్లో ఉన్న హెడ్ కానిస్టేబుల్ పి. సూర్య నారాయణ ఇచ్చిన ఫిర్యాదు మేరకు మేకల నరసింహపై మరో కేసు నమోదు చేశారు. కస్టడీ నుండి పరారైన నిందితుడిని తిరిగి అదుపులోకి తీసుకునేందుకు కదిరి డిఎస్పి శివ నారాయణ స్వామి ఆదేశాల మేరకు ప్రత్యేక పోలీసు బృందాలను ఏర్పాటు చేసి, వివిధ ప్రాంతాల్లో ముమ్మర గాలింపు చర్యలు చేపట్టారు.
ఈ క్రమంలో అర్ధరాత్రి సుమారు 11 గంటల సమయంలో నిందితుడు నెల్లూరు జిల్లా గూడూరు రైల్వే స్టేషన్ పరిసర ప్రాంతంలో ఉన్నట్లు విశ్వసనీయ సమాచారం లభించింది. వెంటనే ప్రత్యేక పోలీసు బృందం గూడూరు రైల్వే స్టేషన్ ప్రాంతానికి చేరుకుని అక్కడ పరారీలో ఉన్న మేకల నరసింహను గుర్తించి అదుపులోకి తీసుకుంది. అనంతరం అతడిని అధికారికంగా అరెస్ట్ చేశారు.
తరువాత నిందితుడిని తిరిగి కదిరి టౌన్ పోలీస్ స్టేషన్కు తరలించి, చట్టపరమైన ప్రక్రియలు పూర్తి చేసిన అనంతరం గౌరవ న్యాయస్థానం ముందు హాజరుపరిచారు. కస్టడీ నుండి పరారైన నిందితుడిని స్వల్ప వ్యవధిలోనే తిరిగి పట్టుకోవడం కోసం ప్రత్యేక బృందాలు సమన్వయంతో పనిచేశాయని, కేసు దర్యాప్తు కొనసాగుతోందని కదిరి డిఎస్పి శివ నారాయణ స్వామి తెలిపారు.
