రాయలసీమ న్యూస్, తిరుపతి: తిరుపతి జిల్లా ఓబులవారిపల్లి మండలం చిన్నవరం పాడు పంచాయతీలో అంగన్వాడీ ఉద్యోగుల సమస్యల పరిష్కారం కోసం నిర్వహించనున్న అంగన్వాడీ తిరుపతి జిల్లా మహాసభలను అక్టోబర్ 10, 11 తేదీల్లో సూళ్లూరుపేటలో విజయవంతం చేయాలని సిఐటియు నాయకులు పిలుపునిచ్చారు. ఈ మేరకు బుధవారం చిన్నవరం పాడులో కరపత్రాలను విడుదల చేశారు.

ఈ కార్యక్రమంలో సిఐటియు రాష్ట్ర కౌన్సిల్ నాయకులు సిహెచ్. చంద్రశేఖర్, కోడూరు ప్రాజెక్టు అధ్యక్షురాలు ఎన్. రమాదేవి, వర్కింగ్ ప్రెసిడెంట్ రాధా కుమారి ఆధ్వర్యం వహించారు. అంగన్వాడీ కార్యకర్తలు, ఆయాలు ఎదుర్కొంటున్న సమస్యలపై జిల్లా మహాసభల్లో విస్తృతంగా చర్చించి, భవిష్యత్ కార్యాచరణ రూపకల్పన చేయనున్నట్లు నాయకులు తెలిపారు.

అంగన్వాడీలకు మెరుగైన వేతనాలు, ఉద్యోగ భద్రత, పెండింగ్ సమస్యల పరిష్కారం, సంక్షేమ పథకాల అమలు, పని భారాన్ని తగ్గించడం వంటి కీలక అంశాలపై ప్రభుత్వం దృష్టి సారించాలని వారు కోరారు. గత ప్రభుత్వ కాలంలో 42 రోజులు చారిత్రాత్మక సమ్మె జరిగిన విషయాన్ని గుర్తుచేశారు.

ఆ సమ్మె సమయంలో వేతనాలు పెంచుతామని హామీ ఇచ్చినట్లు, ఆ ఉద్యమానికి అప్పటి ప్రతిపక్షంలో ఉన్న ముఖ్యమంత్రి చంద్రబాబు మద్దతు తెలిపిన విషయాన్ని నాయకులు పేర్కొన్నారు. అయితే రెండున్నర సంవత్సరాలు గడిచినా ఒక్క రూపాయి కూడా వేతనాలు పెంచలేదని ఆందోళన వ్యక్తం చేశారు.

కేంద్రంలో BJP ప్రభుత్వం అధికారంలోకి వచ్చిన తర్వాత రెండుసార్లు వేతనాలు పెంచుతున్నట్లు ప్రకటించి, వాస్తవానికి ఒక్క రూపాయి కూడా పెంచకుండా అంగన్వాడీ ఉద్యోగులను మోసం చేశారని నాయకులు విమర్శించారు. ధరల పెరుగుదలకు అనుగుణంగా వేతనాల పెంపు, ఖాళీగా ఉన్న సూపర్వైజర్ పోస్టుల భర్తీ, యాప్‌ల ద్వారా పెరిగిన పని భారాన్ని తగ్గించడం, కార్మిక చట్టాల పరిరక్షణ, ఉద్యోగ భద్రత వంటి అంశాల కోసం జరుగుతున్న ఈ మహాసభలకు పెద్ద సంఖ్యలో హాజరై విజయవంతం చేయాలని అంగన్వాడీ కార్యకర్తలు, ఆయాలు, ఉద్యోగులను వారు విజ్ఞప్తి చేశారు.

ఈ మహాసభలకు Anganwadi Workers and Helpers Union (CITU అనుబంధం) రాష్ట్ర కార్యదర్శి కే. సుబ్బారావు అమ్మ, సిఐటియు రాష్ట్ర ఉపాధ్యక్షులు కందారపు మురళి ప్రత్యేక ఆహ్వానితులుగా పాల్గొననున్నట్లు నాయకులు తెలిపారు.

కరపత్రాల విడుదల కార్యక్రమంలో అంగన్వాడీ నాయకురాలు స్వర్ణలత, వాణి, శంకరమ్మ, వరలక్ష్మి, అంజనమ్మ, సునీతతో పాటు స్థానిక అంగన్వాడీ కార్యకర్తలు, ఆయాలు తదితరులు పాల్గొన్నారు. కార్యక్రమం ముగింపు సందర్భంగా సిహెచ్. చంద్రశేఖర్‌కు అభినందనలు తెలిపారు.