రాయలసీమ న్యూస్, తిరుపతి: తిరుపతి జిల్లా ఓజిలి మండలం అత్తివరం ప్రాథమిక ఆరోగ్య కేంద్రంలో వైద్యులు తరచూ విధులకు గైర్హాజరు అవుతున్నారని స్థానిక ప్రజలు ఆరోపిస్తున్నారు. ప్రభుత్వ నియమావళి ప్రకారం ఆరోగ్య కేంద్రం నిరంతరం సేవలు అందించాల్సి ఉన్నప్పటికీ, వైద్యాధికారులు నిర్లక్ష్యంగా వ్యవహరిస్తున్నారని గ్రామస్థులు ఆవేదన వ్యక్తం చేస్తున్నారు.
అత్తివరం ప్రాథమిక ఆరోగ్య కేంద్రం పరిధిలో అనేక గ్రామాలు ఉండగా, రోజూ దాదాపు వందలాది మంది రోగులు చికిత్స కోసం ఇక్కడికి వస్తున్నారు. అయితే వైద్యులు విధులకు హాజరు కాకపోవడంతో రోగులు తిరిగి వెనుదిరగాల్సి వస్తోందని, అత్యవసర పరిస్థితుల్లో మరింత ఇబ్బందులు ఎదుర్కొంటున్నారని స్థానికులు చెబుతున్నారు.
జిల్లా వైద్య ఆరోగ్యశాఖ అధికారుల అండదండలతోనే అత్తివరం ప్రాథమిక ఆరోగ్య కేంద్రం వైద్యాధికారులు విధులకు డుమ్మా కొడుతున్నారని ప్రజలు ఆరోపిస్తున్నారు. పైస్థాయి అధికారుల నిర్లక్ష్యం, పర్యవేక్షణ లోపం వల్లే ఈ పరిస్థితి నెలకొన్నదని గ్రామస్థులు అభిప్రాయపడుతున్నారు.
వైద్యాధికారుల గైర్హాజరు కారణంగా గర్భిణీలు, వృద్ధులు, చిన్నపిల్లలు ఎక్కువగా ఇబ్బందులు పడుతున్నారని స్థానికులు పేర్కొంటున్నారు. సాధారణ జ్వరాలు, జలుబు, రక్తపోటు, మధుమేహం వంటి సాధారణ వ్యాధులకే కూడా సమీప పట్టణాలకు వెళ్లి చికిత్స పొందాల్సి వస్తోందని వారు అంటున్నారు.
ప్రభుత్వ నిబంధనలకు విరుద్ధంగా విధులకు డుమ్మా కొడుతున్న వైద్యాధికారులపై జిల్లా కలెక్టర్ శాఖాపరమైన విచారణ చేపట్టాలని ప్రజలు కోరుతున్నారు. విధుల్లో నిర్లక్ష్యం వహించిన బాధ్యులపై చట్టపరమైన చర్యలు తీసుకుని, ఆరోగ్య కేంద్రం పనితీరును సక్రమంగా పర్యవేక్షించేలా చర్యలు తీసుకోవాలని వారు డిమాండ్ చేస్తున్నారు.
అత్తివరం ప్రాంత ప్రజలకు ప్రాథమిక ఆరోగ్య కేంద్రం ఏకైక ఆశ్రయం కావడంతో, ఇక్కడ వైద్య సేవలు నిరంతరంగా అందుబాటులో ఉండేలా జిల్లా వైద్య ఆరోగ్యశాఖ తక్షణ చర్యలు తీసుకోవాలని గ్రామస్థులు కోరుతున్నారు. ప్రజల ఆరోగ్యాన్ని నిర్లక్ష్యం చేసే విధంగా వైద్యులు వ్యవహరించడాన్ని ఇక సహించబోమని వారు హెచ్చరిస్తున్నారు.
