రాయలసీమ న్యూస్, అన్నమయ్య: బి.కొత్తకోట: రాయలసీమ ఊటీగా పేరుగాంచిన హార్సిలీహిల్స్లో ప్రతిష్ఠాత్మక ఫైవ్స్టార్ హోటల్ నిర్మాణం అనిశ్చితిలోకి వెళ్లింది. ప్రభుత్వం, ప్రైవేటు భాగస్వామ్యంతో సుమారు రూ.200 కోట్ల అంచనా వ్యయంతో ఒబెరాయ్ సంస్థ హోటల్ నిర్మించేందుకు రాష్ట్ర ప్రభుత్వం ఆమోదం తెలిపినా, ప్రాజెక్టు అమలు దిశగా ఇప్పటివరకు గణనీయమైన పురోగతి కనిపించలేదు.
హార్సిలీహిల్స్ కొండపై హోటల్ నిర్మాణం కోసం 2022లోనే 21 ఎకరాల భూమిని ప్రభుత్వం కేటాయించింది. రెండు నెలల్లో పనులు ప్రారంభమవుతాయని అప్పట్లో సంబంధిత అధికారులు ప్రకటించారు. అయితే ఆ తరువాత భూమి కేటాయింపు దశ దాటిన ప్రాజెక్టు, నిర్మాణ పనుల ప్రారంభానికి మాత్రం చేరుకోలేదు.
ఆతిథ్య రంగంలో అంతర్జాతీయ ఖ్యాతి పొందిన ఒబెరాయ్ సంస్థ రాష్ట్రంలో ఐదు చోట్ల హోటళ్లు, విల్లాల నిర్మాణానికి ముందుకు రావడంతో వైకాపా ప్రభుత్వ హయాంలో భూముల కేటాయింపు జరిగింది. ఈ క్రమంలో హార్సిలీహిల్స్లో పట్టుశాఖకు చెందిన పాత భవనాలు, వాటికి ఆనుకుని ఉన్న భూమిని ప్రాజెక్టు కోసం ఎంపిక చేశారు.
గత ఏడాది ఒబెరాయ్ ప్రతినిధుల బృందం హార్సిలీహిల్స్ను సందర్శించి, ఇక్కడ హోటల్ నిర్మాణం ద్వారా కలిగే లాభాలు, అవసరమైన రాయితీలపై వివరాలు సేకరించింది. ఆ తరువాత సంస్థ తరఫున ఎటువంటి స్పష్టమైన చర్యలు కనిపించకపోవడంతో ప్రాజెక్టు భవితవ్యంపై సందేహాలు వ్యక్తమవుతున్నాయి.
ఇటీవల జరిగిన ఎన్నికల తరువాత కూటమి ప్రభుత్వం ఏర్పడిన నేపథ్యంలో, నిలిచిపోయిన ఈ ప్రాజెక్టు మళ్లీ పట్టాలెక్కుతుందనే ఆశలు స్థానికుల్లో కలిశాయి. అయితే దాదాపు రెండేళ్లు గడిచినా హోటల్ నిర్మాణంపై ప్రభుత్వం నుంచి అధికారిక ప్రకటన వెలువడకపోవడంతో ఆ ఆశలు మసకబారుతున్నాయి.
సముద్ర మట్టానికి 4,312 అడుగుల ఎత్తులో విరాజిల్లే హార్సిలీహిల్స్లో ఫైవ్స్టార్ హోటల్ ఏర్పడితే దేశ, విదేశాల నుంచి పర్యాటకులు అధిక సంఖ్యలో తరలివచ్చే అవకాశం ఉందని స్థానికులు భావిస్తున్నారు. దీంతో పర్యాటక రంగం చురుకుదలతో పాటు స్థానిక యువతకు ఉపాధి అవకాశాలు పెరుగుతాయని వారు అంటున్నారు.
ఈ ప్రాజెక్టు స్థితిగతులపై జిల్లా పర్యాటకశాఖ అధికారిని నాగభూషణంను ప్రశ్నించగా, హోటల్ నిర్మాణ ప్రతిపాదన ప్రస్తుతం ప్రభుత్వ పరిశీలనలోనే ఉందని ఆయన తెలిపారు. ప్రాజెక్టు అమలుపై తుది నిర్ణయం కోసం ప్రభుత్వం నుంచి స్పష్టమైన మార్గదర్శకాలు రావాల్సి ఉందని అధికార వర్గాలు సూచిస్తున్నాయి.
