రాయలసీమ న్యూస్, ఎంటర్టైన్మెంట్ డెస్క్:
‘కల్కి 2’ షూటింగ్లో జేడీ చక్రవర్తి, దుల్కర్ సల్మాన్?
హైదరాబాద్లో జోరుగా చిత్రీకరణ
పాన్ ఇండియా స్టార్ ప్రభాస్ హీరోగా నటించిన ‘కల్కి 2898 ఏడీ’ చిత్రం బ్లాక్ బస్టర్ విజయాన్ని నమోదు చేసిన విషయం తెలిసిందే. దర్శకుడు నాగ్ అశ్విన్ రూపొందించిన ఈ ఎపిక్ సైన్స్ ఫిక్షన్ ఫాంటసీ సినిమా ప్రపంచవ్యాప్తంగా బాక్సాఫీస్ వద్ద సుమారు రూ.1200 కోట్ల వరకు వసూళ్లు సాధించింది. ఈ విజయంతో సీక్వెల్పై భారీ అంచనాలు నెలకొన్నాయి. ‘కల్కి 2’ కోసం ప్రేక్షకులు ఆసక్తిగా ఎదురుచూస్తున్నారు.
ఈ నేపథ్యంలో సీక్వెల్కు సంబంధించిన పలు వార్తలు సోషల్ మీడియాలో చక్కర్లు కొడుతున్నాయి. ‘కల్కి 2’లో ప్రభాస్తో పాటు బిగ్ బి అమితాబ్ బచ్చన్, విశ్వనటుడు కమల్ హాసన్, దుల్కర్ సల్మాన్, దిశా పటానీ కీలక పాత్రల్లో కనిపించనున్నారని టాక్ వినిపిస్తోంది. ‘కల్కి 2898 AD’లో కథానాయికగా నటించిన దీపికా పదుకొణేను క్రియేటివ్ డిఫరెన్సెస్ కారణంగా సీక్వెల్ నుంచి తప్పించారని, ఆమె స్థానంలో నేచురల్ బ్యూటీ సాయి పల్లవిని ఎంపిక చేశారని గత కొంతకాలంగా వార్తలు వస్తున్నాయి.
ఇదిలా ఉండగా, ఈ చిత్రంలో మరో ప్రముఖ నటుడు జేడీ చక్రవర్తి కూడా భాగం కానున్నారనే ప్రచారం జోరుగా సాగుతోంది. ‘కల్కి 2’లో ఆయన కీలక పాత్రలో నటిస్తున్నారని, ఇటీవలే సెట్స్లో అడుగుపెట్టారని సినీ వర్గాల్లో చర్చ నడుస్తోంది. అయితే ఈ సమాచారం పై అధికారిక ధృవీకరణ మాత్రం ఇంకా వెలువడలేదు.
‘కల్కి’ సీక్వెల్ షూటింగ్ కొన్ని రోజుల క్రితం హైదరాబాద్లో ప్రత్యేకంగా నిర్మించిన సెట్స్లో ప్రారంభమైనట్టు సమాచారం. ప్రారంభ దశలో ప్రభాస్ లేని సన్నివేశాలను చిత్రీకరించినట్లు టాక్. అమితాబ్ బచ్చన్, కమల్ హాసన్ పాల్గొన్న కొన్ని సీన్లను కూడా షూట్ చేశారని వార్తలు వస్తున్నాయి. ప్రస్తుతం జేడీ చక్రవర్తి, దుల్కర్ సల్మాన్పై సన్నివేశాలు చిత్రీకరిస్తున్నారని ఫిల్మ్ నగర్లో వినిపిస్తున్నప్పటికీ, దీనిపై మేకర్స్ నుంచి ఇంకా స్పష్టత రావాల్సి ఉంది.
‘శివ’ సినిమాతో విలన్గా తెలుగు ప్రేక్షకులకు పరిచయమైన జేడీ చక్రవర్తి, అనంతరం హీరోగా తనకంటూ ప్రత్యేకమైన గుర్తింపు తెచ్చుకున్నారు. రెండో ఇన్నింగ్స్లో సినిమాలు, వెబ్ సిరీస్లలో వైవిధ్యమైన పాత్రలు చేస్తూ మళ్లీ బిజీ అయ్యారు. ఇప్పుడు ‘కల్కి 2’లో ఆయన నటిస్తే, అది ఆయన కెరీర్కు మరో మంచి ఆఫర్గా భావించవచ్చు. పాన్ ఇండియా స్థాయిలో జేడీకి ఉన్న పాపులారిటీ ఈ చిత్ర మార్కెట్కు తోడ్పడే అవకాశం ఉందని సినీ విశ్లేషకులు అభిప్రాయపడుతున్నారు.
వైజయంతీ మూవీస్ బ్యానర్పై భారీ బడ్జెట్తో ‘కల్కి 2’ రూపొందుతోంది. ఈ చిత్రానికి ‘కర్ణ 3102 BC’ అనే టైటిల్ను పరిశీలిస్తున్నారనే ప్రచారం ఉంది. ఈ సినిమా విడుదల ఎప్పుడు ఉంటుందనే ప్రశ్నకు సంబంధించి ఇటీవల గద్దర్ అవార్డుల కార్యక్రమంలో నిర్మాత ప్రియాంక దత్ను యాంకర్ సుమ ప్రశ్నించగా, ప్రియాంక దత్ హాస్యంగా స్పందించినట్టు వార్తలు వచ్చాయి.
గతంలో ఈ ప్రాజెక్ట్ గురించి నాగ్ అశ్విన్ మాట్లాడిన సందర్భంలో, గ్రహాలు అన్నీ ఒకే చోటకు చేరినప్పుడు ఈ సినిమా వస్తుందని నవ్వుతూ చెప్పినట్లు గుర్తుచేసుకుంటున్నారు సినీ అభిమానులు. మొత్తానికి, అధికారిక ప్రకటనలు వెలువడే వరకు ‘కల్కి 2’ నటీనటులు, టైటిల్, విడుదల తేదీపై ఊహాగానాలు కొనసాగేలా కనిపిస్తున్నాయి.
