రాయలసీమ న్యూస్, తిరుపతి: తిరుపతి జిల్లా ఓజిలి మండలం కర్రబల్లవోలు గ్రామంలోని ప్రభుత్వ పాఠశాలలో శుక్రవారం నిర్వహించిన పాఠశాల విద్యా కమిటీ సమావేశంలో ఉద్రిక్త పరిస్థితులు నెలకొన్నాయి. విద్యా కమిటీ సభ్యుల ఎన్నికపై నిర్ణయం తీసుకునేందుకు ఏర్పాటు చేసిన ఈ సమావేశం మధ్యలోనే గందరగోళానికి గురైంది.
సమావేశంలో ఓ అభ్యర్థి వర్గానికి మెజారిటీ ఓట్లు ఎక్కువగా వచ్చినట్లు తెలిసిన వెంటనే మరో వర్గానికి చెందిన వ్యక్తి అసంతృప్తి వ్యక్తం చేసినట్టు సమాచారం. ఆగ్రహంతో ఊగిపోయిన ఆ వ్యక్తి, హెడ్మాస్టర్ సమక్షంలోనే సమావేశానికి సంబంధించిన నిర్ణయ పత్రాలు, ఓటింగ్ పత్రాలను చించి పారేసినట్లు అక్కడి వారంటున్నారు.
ఈ ఘటనతో సమావేశం అక్కడికక్కడే నిలిచిపోయింది. అనూహ్యంగా జరిగిన ఈ పరిణామంతో ఉపాధ్యాయులు, తల్లిదండ్రులు ఒక్కసారిగా దిగ్భ్రాంతికి గురయ్యారు. పాఠశాల హెడ్మాస్టర్ సమక్షంలోనే ఇలా జరగడం పట్ల తల్లిదండ్రులు తీవ్రంగా ప్రశ్నిస్తున్నట్లు తెలుస్తోంది.
తల్లిదండ్రుల అభిప్రాయం ప్రకారం, ప్రభుత్వ నిబంధనల మేరకు పాఠశాల విద్యా కమిటీని ఏకగ్రీవంగా, ప్రజాస్వామ్య పద్ధతిలో ఎన్నుకోవాలని స్పష్టం చేస్తుంది. ఓటింగ్ ప్రక్రియలో ఉపయోగించే పత్రాలు, నిర్ణయ పత్రాలను చించడం చట్టపరంగా నేరంగా పరిగణించబడుతుందని వారు గుర్తుచేస్తున్నారు.
ఈ ఘటనపై సంబంధిత ఉన్నతాధికారులు అయిన MEO, DEOలు ఎలా స్పందిస్తారన్న దానిపై ఇప్పుడు ఆసక్తి నెలకొంది. పాఠశాలలో జరిగిన ఈ గందరగోళంపై వారు చట్టపరమైన చర్యలు తీసుకుంటారా లేదా అన్న దానిపై స్థానికులు, తల్లిదండ్రులు ఎదురుచూస్తున్నారు.
కర్రబల్లవోలు ప్రభుత్వ పాఠశాలలో జరిగిన ఈ ఘటనతో విద్యా కమిటీ ఎన్నికల నిర్వహణ, పాఠశాల పరిపాలనపై మరోసారి చర్చ మొదలైంది. పాఠశాలల్లో ప్రజాస్వామ్య ప్రక్రియలు సజావుగా సాగేందుకు కఠిన చర్యలు అవసరమని కొంతమంది తల్లిదండ్రులు అభిప్రాయపడుతున్నారు.
