రాయలసీమ న్యూస్, తిరుపతి: కేవీబీపురం మండలంలో ఆదివారం జరిగిన రోడ్డు ప్రమాదంలో ఒక వ్యక్తి మృతి చెందిన ఘటన స్థానికంగా విషాదాన్ని మిగిల్చింది. ఏర్పేడు మండలం, పెనుమల్లం గ్రామానికి చెందిన పెమ్ముగారి సెల్వ కుమార్ (50) ఈ ప్రమాదంలో ప్రాణాలు కోల్పోయారు.
పోలీసులు, స్థానికుల కథనం ప్రకారం ఆదవరం గ్రామానికి చెందిన అక్క పార్వతమ్మ కుటుంబంలో జరిగిన శుభకార్యానికి సెల్వ కుమార్ ద్విచక్ర వాహనంపై హాజరయ్యారు. కార్యక్రమం ముగిసిన అనంతరం తిరుగు ప్రయాణంలో ఆయన ద్విచక్ర వాహనంపై కేవీబీపురం మండలం పరిధిలోని గుంటమెట్టు వద్దకు చేరుకున్నారు.
అప్పటికే శ్రీకాళహస్తి నుంచి వస్తున్న ఆర్టీసీ బస్సు గుంటమెట్టు వద్ద సెల్వ కుమార్ ప్రయాణిస్తున్న ద్విచక్ర వాహనాన్ని ఢీకొట్టినట్లు పోలీసులు తెలిపారు. ఢీకొట్టడంతో సెల్వ కుమార్ తీవ్రంగా గాయపడ్డారు. అక్కడున్న వారు వెంటనే సమాచారం ఇచ్చి 108 అంబులెన్స్ ద్వారా అతన్ని ఆస్పత్రికి తరలించే ప్రయత్నం చేశారు.
అయితే చికిత్స నిమిత్తం ఆస్పత్రికి తరలిస్తుండగా మార్గమధ్యంలో కొత్తకండ్రిగ వద్ద సెల్వ కుమార్ మృతిచెందారు. ప్రమాదం సమాచారం అందుకున్న కుటుంబ సభ్యులు, గ్రామస్థులు ఆస్పత్రికి చేరుకుని మృతదేహాన్ని స్వీకరించారు.
మృతుడు సెల్వ కుమార్కు భార్య కృష్ణవేణి, కుమారుడు భరత్కుమార్ ఉన్నారు. సెంట్రింగ్ పని చేసుకుంటూ కుటుంబాన్ని పోషిస్తున్న సెల్వ కుమార్ అకాల మరణంతో ఆ కుటుంబం ఆర్థికంగా, సామాజికంగా తీవ్ర ఇబ్బందుల్లోకి వెళ్లినట్లు గ్రామస్థులు పేర్కొన్నారు.
ప్రమాద స్థలాన్ని పరిశీలించిన పోలీసులు మృతదేహాన్ని పోస్టుమార్టం నిమిత్తం శ్రీకాళహస్తి ఏరియా హాస్పిటల్కి తరలించారు. ఆర్టీసీ బస్సు, ద్విచక్ర వాహనాన్ని స్వాధీనం చేసుకుని కేసు నమోదు చేసి దర్యాప్తు ప్రారంభించినట్లు పోలీసులు తెలిపారు.
ఈ ఘటనపై కేవీబీపురం పోలీస్ స్టేషన్ పరిధిలో కేసు నమోదు చేసి, బస్సు డ్రైవర్ నిర్లక్ష్యం కారణమైందా, లేక ఇతర కారణాల వల్ల ప్రమాదం జరిగిందా అనే కోణంలో విచారణ కొనసాగిస్తున్నట్లు పోలీసు వర్గాలు పేర్కొన్నాయి.
కేసు నమోదు చేసి దర్యాప్తు చేస్తున్నట్లు ఎస్ఐ ఓబయ్య తెలిపారు.
