రాయలసీమ న్యూస్, తిరుపతి: తిరుపతి జిల్లా శ్రీకాళహస్తి పట్టణంలోని శ్రీరామ్ నగర్ కాలనీలో తాళం వేసి ఉన్న ఇంటిలో జరిగిన చోరీ కేసును శ్రీకాళహస్తి వన్టౌన్ పోలీసులు చాకచక్యంగా ఛేదించారు. ఈ కేసులో ఇద్దరు పాత నేరస్థులను అరెస్ట్ చేసి, వారి వద్ద నుంచి చోరీ సొత్తుతో పాటు ఇతర వస్తువులను స్వాధీనం చేసుకున్నారు. ఆస్తి నేరాల నియంత్రణకు జిల్లా పోలీసు శాఖ ప్రత్యేక దృష్టి సారించిన నేపథ్యంలో ఈ కేసు వేగంగా ఛేదించబడింది.
తిరుపతి జిల్లా ఎస్పీ శ్రీ ఎల్. సుబ్బరాయుడు, ఐపీఎస్., గారి ఆదేశాల మేరకు ఆస్తి నేరాలపై కఠిన చర్యలు తీసుకోవాలని జిల్లా పోలీసులకు సూచనలు జారీ అయ్యాయి. వాటి అమలులో భాగంగా శ్రీకాళహస్తి వన్టౌన్ పోలీసు స్టేషన్ పరిధిలో నమోదైన ఈ ఇంటి చోరీ కేసును అత్యంత సమర్థవంతంగా దర్యాప్తు చేసి నిందితులను పట్టుకున్నారు.
నిందితుల వివరాలు ఇలా ఉన్నాయి: అక్కుర్తి నవీన్ @ లవ్ లీ (26), వెంగమాంబాపురం గ్రామం, బాలాయపల్లె మండలం, తిరుపతి జిల్లా. ఇతనిపై 24 పాత కేసులు నమోదైనట్లు పోలీసులు గుర్తించారు. మరో నిందితుడు డేరంగుల జగదీష్ (25), అయ్యప్ప కాలనీ, శివజ్యోతి నగర్, తిరుపతి. ఇతనిపై 08 పాత కేసులు ఉన్నట్లు దర్యాప్తులో తేలింది.
ఈ నెల 07-07-2026 రాత్రి శ్రీకాళహస్తి పట్టణంలోని శ్రీరామ్ నగర్ కాలనీలో తాళం వేసి ఉన్న ఒక ఇంటి గ్రిల్స్, ప్రధాన ద్వారం పగులగొట్టి లోపలికి ప్రవేశించిన దుండగులు బీరువాలో ఉన్న బంగారు ఆభరణాలను అపహరించారు. బాధితుల ఫిర్యాదు మేరకు శ్రీకాళహస్తి వన్టౌన్ పోలీస్ స్టేషన్లో కేసు నమోదు చేసి దర్యాప్తు ప్రారంభించారు.
ఫిర్యాదు అందిన వెంటనే జిల్లా ఎస్పీ శ్రీ ఎల్. సుబ్బరాయుడు, ఐపీఎస్., గారు కేసును అత్యంత ప్రాధాన్యతగా తీసుకున్నారు. ఆయన ఆదేశాలపై శ్రీకాళహస్తి డీఎస్పీ శ్రీ కె. నరసింహమూర్తి గారి పర్యవేక్షణలో, శ్రీకాళహస్తి వన్టౌన్ సీఐ శ్రీ సి. వెంకటేష్ ఆధ్వర్యంలో WSI ఎం. స్వాతి, ఎస్ఐ ఎం. రామకృష్ణ మరియు సిబ్బందితో కలిసి రెండు ప్రత్యేక బృందాలను ఏర్పాటు చేసి దర్యాప్తు చేపట్టారు.
దర్యాప్తులో భాగంగా సాంకేతిక ఆధారాలు, నిఘా సమాచారం, పాత నేరస్థుల కదలికలను విశ్లేషించిన పోలీసులు తిరుపతి, నెల్లూరు, చిత్తూరు జిల్లాల్లో పలు దొంగతనాల కేసుల్లో ప్రధాన నిందితులుగా ఉన్న అక్కుర్తి నవీన్ @ లవ్ లీ, డేరంగుల జగదీష్లపై దృష్టి సారించారు. వారి కదలికలను నిశితంగా గమనించి, సేకరించిన ఆధారాల ఆధారంగా వారిని అదుపులోకి తీసుకుని విచారణ జరిపారు.
నిందితుల వద్ద నుంచి సుమారు రూ.1.20 లక్షల విలువైన బంగారు ఆభరణాలు, ఒక ఆటో, ఇనుప రాడ్లు తదితర వస్తువులను పోలీసులు స్వాధీనం చేసుకున్నారు. కేసును వేగంగా ఛేదించిన పోలీసు బృందాన్ని జిల్లా ఎస్పీ ప్రశంసించినట్లు సమాచారం. ఇళ్లకు తాళాలు వేసి వెళ్లే ప్రజలు తప్పనిసరిగా సమీప పోలీస్ స్టేషన్కు సమాచారం ఇవ్వాలని, ఆస్తి భద్రత విషయంలో జాగ్రత్తలు పాటించాలని పోలీసు శాఖ ప్రజలకు విజ్ఞప్తి చేసింది.
