రాయలసీమ న్యూస్, తిరుపతి: రేణిగుంట: తిరుపతి అంతర్జాతీయ విమానాశ్రయం వెలుపల పార్కింగ్ ప్రాంతంలో నీటి సమస్య తీవ్రంగా తలెత్తింది. పార్కింగ్ ఏరియాలో ఉన్న మరుగుదొడ్లకు నీటి సరఫరా నిలిచిపోవడంతో వాటిని మూసివేసి తాళాలు వేసినట్లు సమాచారం. దీంతో అక్కడికి వచ్చే ప్రయాణికులు, విధుల్లో ఉన్న పోలీసు సిబ్బంది తీవ్ర అసౌకర్యాన్ని ఎదుర్కొంటున్నారు.
విమానాశ్రయం పరిసరాల్లో ఉన్న బోరు మరమ్మతులకు గురికావడంతో గత రెండు రోజులుగా నీటి సరఫరా నిలిచిపోయినట్లు స్థానిక వర్గాలు చెబుతున్నాయి. బోరు పనులు సాగుతుండటంతో పార్కింగ్ ప్రాంతంలోని వాష్రూమ్లకు నీరు అందకపోవడం, ఫలితంగా వాటిని తాత్కాలికంగా మూసివేయాల్సి వచ్చిన పరిస్థితి నెలకొంది.
తిరుపతి అంతర్జాతీయ విమానాశ్రయానికి ఇటీవలి కాలంలో ప్రముఖుల రాకపోకలు గణనీయంగా పెరిగాయి. ఈ నేపథ్యంలో విమానాల రాకపోకల సమయంలో పార్కింగ్ ఏరియాలో గంటల తరబడి వేచి ఉండే ప్రయాణికులు, బంధువులు, భద్రతా సిబ్బంది మరుగుదొడ్డి సౌకర్యం లేక ఇబ్బందులు పడుతున్నారు. ముఖ్యంగా వృద్ధులు, మహిళలు, చిన్నారులతో వచ్చే కుటుంబాలకు ఈ సమస్య మరింత ఇబ్బందికరంగా మారింది.
విమానాశ్రయం ప్రధాన భవనంలో వాష్రూమ్ సౌకర్యం ఉన్నప్పటికీ, పార్కింగ్ ప్రాంతం నుంచి అక్కడికి వెళ్లడం అందరికీ సాధ్యంకాకపోవడంతో అసంతృప్తి వ్యక్తమవుతోంది. పార్కింగ్ ఏరియాలోనే కనీస మరుగుదొడ్డి సౌకర్యం కూడా అందుబాటులో లేకపోవడం పట్ల ప్రయాణికులు ఆగ్రహం వ్యక్తం చేస్తున్నట్లు తెలుస్తోంది.
సంబంధిత అధికారులు వెంటనే స్పందించి బోరు మరమ్మతులను పూర్తి చేసి, పార్కింగ్ ప్రాంతంలోని మరుగుదొడ్లకు నీటి సరఫరాను పునరుద్ధరించాలని ప్రయాణికులు కోరుతున్నారు. విమానాశ్రయం వంటి కీలక ప్రజాసేవా కేంద్రంలో ఇలాంటి ప్రాథమిక సౌకర్యాల లోపం ఉండకూడదని వారు అభిప్రాయపడుతున్నారు.
తిరుపతి వంటి ప్రముఖ పుణ్యక్షేత్రానికి వచ్చే దేశీ, విదేశీ భక్తులు, పర్యాటకులు మొదట అడుగుపెట్టే ప్రదేశాల్లో ఒకటైన ఈ విమానాశ్రయంలో శుభ్రత, మరుగుదొడ్డి, తాగునీటి వంటి సౌకర్యాలపై అధికారులు మరింత దృష్టి పెట్టాల్సిన అవసరం ఉందని స్థానికులు సూచిస్తున్నారు. పార్కింగ్ ఏరియాలో నీటి సమస్యను శాశ్వతంగా పరిష్కరించేలా చర్యలు తీసుకోవాలని వారు కోరుతున్నారు.
