రాయలసీమ న్యూస్, తిరుపతి: నాయుడుపేట పట్టణ సమగ్ర అభివృద్ధితో పాటు నియోజకవర్గ ప్రజల సంక్షేమానికి కూటమి ప్రభుత్వం అత్యంత ప్రాధాన్యత ఇస్తోందని సూళ్లూరుపేట శాసనసభ్యురాలు డాక్టర్ నెలవల విజయశ్రీ స్పష్టం చేశారు. అక్టోబర్ 1న నాయుడుపేట పట్టణంలో నిర్వహించిన భారీ ర్యాలీ, బహిరంగ సభల సందర్భంగా ఆమె పలు కీలక అభివృద్ధి కార్యక్రమాలను ప్రకటించారు.
గురువారం నాయుడుపేట పట్టణంలోని అగ్రహారపేట, అరుంధతీవాడ మాతమ్మ గుడి వద్ద ప్రారంభమైన ర్యాలీ, స్థానిక హరిజనవాడ వెంకటేశ్వర స్వామి దేవాలయం వరకు అత్యంత ఉత్సాహభరిత వాతావరణంలో సాగింది. ఈ సందర్భంగా ఇంటింటికీ వెళ్లిన ఎమ్మెల్యే విజయశ్రీ, లబ్ధిదారులకు స్వయంగా ‘ఎన్టీఆర్ భరోసా’ పింఛన్లను పంపిణీ చేశారు.
అనంతరం ఏర్పాటు చేసిన బహిరంగ సభలో మాట్లాడుతూ, రాబోయే రెండేళ్లలో నాయుడుపేట పట్టణ రూపురేఖలను మార్చేలా అభివృద్ధి కార్యక్రమాలు చేపడతామని ఎమ్మెల్యే విజయశ్రీ తెలిపారు. వెంకటగిరి రోడ్డులోని స్వర్ణముఖి నది వరకు రోడ్డు డివైడర్లు, అత్యాధునిక సెంట్రల్ లైటింగ్ వ్యవస్థను ఏర్పాటు చేసి పట్టణాన్ని సుందరీకరించే ప్రణాళికను వివరించారు.
పట్టణ ప్రజల శాశ్వత తాగునీటి సమస్య పరిష్కారానికి సుమారు ₹226 కోట్ల అంచనా వ్యయంతో కేపీ తెలుగుగంగ కెనాల్ అనుసంధాన తాగునీటి ప్రాజెక్టు పనులను త్వరితగతిన పూర్తి చేసి ప్రజల దాహార్తిని తీర్చేలా చర్యలు తీసుకుంటామని ఆమె వెల్లడించారు. పేద ప్రజలందరూ టిడ్కో ఇళ్ల కోసం దరఖాస్తు చేసుకోవాలని సూచించారు.
నియోజకవర్గంలో 90 శాతానికి పైగా అర్హులైన వారికి మూడు దశల్లో నూతన పింఛన్లను మంజూరు చేసి న్యాయం చేస్తామని ఎమ్మెల్యే భరోసానిచ్చారు. కార్మికుల సమస్యల పరిష్కారానికి, వారికి సంక్షేమ పథకాలు దక్కేలా రాబోయే అసెంబ్లీ సమావేశాల్లో గళమెత్తుతానని తెలిపారు.
అర్హులైన నిరుపేద కార్మికులకు అన్నా చెరువు వద్ద ఇళ్ల పట్టాలు మంజూరయ్యేలా చిత్తశుద్ధితో కృషి చేస్తానని హామీ ఇచ్చారు. అధికారంలోకి వచ్చిన వెంటనే మహిళలకు ఉచిత బస్సు ప్రయాణం, ఏడాదికి మూడు ఉచిత గ్యాస్ సిలిండర్ల పంపిణీ వంటి చారిత్రాత్మక హామీలను సమర్థవంతంగా అమలు చేస్తూ పేదల అభ్యున్నతికి కూటమి ప్రభుత్వం బాటలు వేస్తోందని ఆమె స్పష్టం చేశారు.
ఈ కార్యక్రమంలో స్థానిక ప్రజాప్రతినిధులు, కూటమి నాయకులు, కార్యకర్తలు, వివిధ శాఖల అధికారులు మరియు పెద్ద సంఖ్యలో ప్రజలు పాల్గొన్నారు. నాయుడుపేట పట్టణ సమగ్ర అభివృద్ధి, అర్హులందరికీ సంక్షేమ ఫలాలు అందేలా చర్యలు కొనసాగుతాయని ఎమ్మెల్యే విజయశ్రీ పునరుద్ఘాటించారు.
