రాయలసీమ న్యూస్, తిరుపతి: సూలూరుపేట నియోజకవర్గంలోని నాయుడుపేట మండల కేంద్రంలో నేషనల్ హైవే-71కు ఆనుకుని ఉన్న ప్రభుత్వ స్థలాలపై జరుగుతున్న ఆక్రమణలపై పట్టణ ప్రజలు తీవ్ర ఆగ్రహం వ్యక్తం చేస్తున్నారు. ముఖ్యంగా తుమ్మూరు టీటీడీ కళ్యాణ మండపం నుండి ట్రినిటీ హాస్పిటల్ వరకు ఉన్న ప్రాంతంలో రేకుల షెడ్లు, కట్టడాలు నిర్మిస్తూ కొంతమంది ప్రభావశీలులు ప్రభుత్వ భూములను ఆక్రమించుకుంటున్నారని స్థానికులు ఆరోపిస్తున్నారు.
ఈ అక్రమ నిర్మాణాలపై పలుమార్లు ఫిర్యాదులు చేసినా, నాయుడుపేట మున్సిపల్ కమిషనర్ స్పందించడం లేదని పట్టణ వాసులు వాపోతున్నారు. పెద్దల ఆక్రమణల విషయంలో మున్సిపాలిటీ అధికారులు కనీసం పట్టించుకోకపోగా, బలహీన వర్గాల పేదలపై మాత్రం కఠిన చర్యలు తీసుకుంటున్నారని వారు ఆరోపిస్తున్నారు.
పట్టణంలోని ఓ నిరుపేద వ్యక్తి జీవనోపాధి కోసం అప్పుచేసి చిన్నపాటి షెల్టర్ నిర్మించుకున్న విషయం ప్రస్తావనకు వచ్చింది. ఆ నిర్మాణాన్ని మున్సిపల్ కమిషనర్ మరుసటి రోజే సిబ్బందితో కలిసి JCB పంపించి కూల్చివేసినట్లు స్థానికులు ఆరోపణలు చేస్తున్నారు. అదే సమయంలో, జాతీయ రహదారి 71 పరిసరాల్లో ఉన్న పెద్దల రేకుల షెడ్లు, కట్టడాలపై మాత్రం చర్యలు లేకపోవడం ప్రజల్లో అనుమానాలకు, ఆగ్రహానికి కారణమవుతోంది.
ఎన్ హెచ్-71కు సంబంధించిన రోడ్డుపై D.S.R కళ్యాణ మండపం ఎదురుగా కొంతమంది పెద్దలు రేకుల షెడ్లు నిర్మించి ప్రభుత్వ స్థలాలను ఆక్రమించుకున్నారని స్థానికులు చెబుతున్నారు. ఈ నిర్మాణాలు మున్సిపల్ కమిషనర్ కంటికి కనిపించవా, లేక చూసి చూడనట్టు వ్యవహరిస్తున్నారా అని ప్రజలు ప్రశ్నిస్తున్నారు. ఆక్రమణలు పూర్తిగా తొలగించి ప్రభుత్వ స్థలాలను కాపాడాలని వారు డిమాండ్ చేస్తున్నారు.
మున్సిపల్ కమిషనర్ ఆక్రమణదారుల వద్ద భారీగా ముడుపులు తీసుకుని, వారికి చిరస్థాయిగా కట్టడాలు చేసుకునేలా సహకరిస్తున్నారనే ఆరోపణలు కూడా ప్రజల్లో వినిపిస్తున్నాయి. ఆ కట్టడాల్లో గదులను అద్దెకు ఇచ్చే స్థాయికి వెళ్లినా, అలాంటి వారిపై చర్యలు తీసుకోకుండా కూటమి నాయకుల మాట మేరకు కమిషనర్ వ్యవహరిస్తున్నారని పట్టణ వాసులు ఆరోపిస్తున్నారు.
పెద్దలకు ఒక న్యాయం, బలహీన దళితులకు మరో న్యాయం అన్నట్టుగా మున్సిపల్ కమిషనర్ వ్యవహరిస్తున్నారని నాయుడుపేట ప్రజలు విమర్శిస్తున్నారు. ఆక్రమణలకు సహకరిస్తున్నట్టుగా కనిపిస్తున్న కమిషనర్ తీరుపై వారు సారిత్రక విమర్శలు చేస్తూ, కనీసం ఉన్నతాధికారులు జోక్యం చేసుకుని ఎన్ హెచ్-71 పరిసరాల ప్రభుత్వ స్థలాలపై ఉన్న అన్ని ఆక్రమణలను తొలగించాలని కోరుతున్నారు.
