రాయలసీమ న్యూస్, తిరుపతి: తిరుమల శ్రీవారి దర్శనానికి వెళ్లే భక్తులకు తిరుమల తిరుపతి దేవస్థానం ముందస్తు సూచన జారీ చేసింది. తిరుమల గిరులు సంవత్సరం పొడవునా భక్తులతో కిటకిటలాడుతుండటంతో, దర్శనానికి ముందుగానే ఆన్‌లైన్‌లో టికెట్లు బుక్ చేసుకోవడం ద్వారా ఇబ్బందులు తప్పించుకోవాలని టీటీడీ సూచిస్తోంది.
దర్శన టికెట్లతో పాటు వివిధ సేవా టికెట్లు, అద్దె గదుల బుకింగ్‌ను కూడా టీటీడీ ఆన్‌లైన్‌ ద్వారా అందుబాటులోకి తీసుకువస్తోంది. ఈ క్రమంలో అక్టోబర్ నెలకు సంబంధించిన ఆన్‌లైన్‌ టికెట్లను నేడు విడుదల చేయనున్నట్లు దేవస్థానం ప్రకటించింది.
టీటీడీ సమాచారం ప్రకారం, నేడు ఉదయం 10 గంటలకు అంగప్రదక్షిణం టోకెన్స్ , ఉదయం 11 గంటలకు శ్రీవాణి దర్శన్ టికెట్స్ , మధ్యాహ్నం 3 గంటలకు వయోవృద్ధులు, వికలాంగుల కోసం ప్రత్యేక దర్శనం టికెట్లు ఆన్‌లైన్‌లో అందుబాటులోకి రానున్నాయి. భక్తులు టీటీడీ అధికారిక వెబ్‌సైట్‌ ద్వారా ఈ టికెట్లను బుక్ చేసుకోవచ్చు.
అదే విధంగా, రేపు ఉదయం 10 గంటలకు రూ.300 స్పెషల్ ఎంట్రీ దర్శన్ టికెట్లను విడుదల చేయనున్నట్లు తిరుమల తిరుపతి దేవస్థానం తెలిపింది. అక్టోబర్ నెలలో దర్శనం ప్లాన్‌ చేసుకున్న భక్తులు ఈ షెడ్యూల్ ప్రకారం టికెట్లు బుక్ చేసుకోవాలని టీటీడీ సూచిస్తోంది.
ఇక మరోవైపు, తిరుమలలో భక్తుల రద్దీ కొనసాగుతోంది. వైకుంఠం క్యూ కాంప్లెక్స్‌లోని అన్ని కంపార్ట్‌మెంట్లు నిండిపోవడంతో, టోకెన్‌ లేని భక్తులు వెలుపల క్యూలైన్లలో దీర్ఘకాలం వేచి ఉండాల్సి వస్తోంది. టోకెన్‌ లేకుండా శ్రీవారి సర్వదర్శనం కోసం ప్రస్తుతం సుమారు 20 గంటల సమయం పడుతున్నట్లు అధికారులు వెల్లడించారు.
తిరుమల తిరుపతి దేవస్థానం విడుదల చేసిన గణాంకాల ప్రకారం, నిన్న ఒక్కరోజే 77,874 మంది భక్తులు శ్రీవారిని దర్శించుకున్నారు. అదే రోజున 35,302 మంది భక్తులు తలనీలాలు సమర్పించారు. శ్రీవారి హుండీ ఆదాయం రూ.4.92 కోట్లుగా నమోదైనట్లు టీటీడీ ప్రకటించింది.
తిరుమలలో కొనసాగుతున్న భారీ భక్తుల రద్దీ, అక్టోబర్ నెల దర్శనం టికెట్ల విడుదల నేపథ్యంలో, భక్తులు ముందస్తు ప్రణాళికతో ఆన్‌లైన్‌ బుకింగ్‌ చేసుకుని రావాలని దేవస్థానం అధికారులు సూచిస్తున్నారు.
