రాయలసీమ న్యూస్, తిరుపతి: తిరుమలలో శ్రీవారి వీఐపీ దర్శనాలు రద్దు చేసిన నేపథ్యంలో భక్తులు తీవ్ర అసంతృప్తి వ్యక్తం చేశారు. సిఫార్సు లేఖలు తీసుకోలేదంటూ, ముందస్తు సమాచారం లేకుండా దర్శనం రద్దు చేశారంటూ శనివారం తిరుమలలో భక్తులు నిరసనకు దిగారు. జేఈఓ కార్యాలయం ఎదుట గుమిగూడి తమకు న్యాయం చేయాలని డిమాండ్ చేశారు.
టీటీడీ రెండు రోజుల ముందే వీఐపీ దర్శనాలు రద్దు చేస్తున్నట్లు ప్రకటన చేసినప్పటికీ, సిఫార్సు లేఖలతో వచ్చిన భక్తులకు దర్శనం కల్పించకపోవడంపై ఆగ్రహం వ్యక్తమవుతోంది. నెలల తరబడి ఎమ్మెల్యే వెంట తిరిగి సిఫార్సు లేఖలు తెచ్చుకున్నామని, చివరికి వాటిని స్వీకరించలేదని భక్తులు ఆరోపిస్తున్నారు.
వీఐపీ దర్శనం రద్దు నిర్ణయం సమంజసం కాదని, కనీసం ఇప్పటికే సిఫార్సు లేఖలు పొందిన వారికి దర్శనం అవకాశం ఇవ్వాల్సిందిగా భక్తులు అభిప్రాయపడ్డారు. సుదూర ప్రాంతాల నుంచి ఎంతో కష్టపడి తిరుమల చేరుకున్నామని, ముందస్తు సమాచారం లేకపోవడంతో తీవ్ర ఇబ్బందులు పడ్డామని వారు పేర్కొన్నారు.
సిఫార్సు లేఖలతో వచ్చినా దర్శనం కల్పించలేదని ఆరోపించిన భక్తులు, టీటీడీ అధికారులు తమ సమస్యలను పట్టించుకోవాలని కోరారు. వీఐపీ దర్శనం రద్దు నిర్ణయాన్ని పునర్విమర్శించి, భక్తులకు ఇబ్బంది కలగకుండా చూడాలని డిమాండ్ చేశారు.
భక్తుల నిరసన, ఆవేదనల నేపథ్యంలో టీటీడీ చివరికి రూ.300 ప్రత్యేక ప్రవేశ దర్శనం కల్పించింది. దీంతో కొంతమంది భక్తులు ఆ దర్శనం ద్వారా శ్రీవారిని దర్శించుకునే అవకాశం పొందారు. అయితే సిఫార్సు లేఖలతో వచ్చిన వారికి వీఐపీ దర్శనం ఇవ్వకపోవడంపై అసంతృప్తి కొనసాగుతోంది.
తిరుమలలో వీఐపీ దర్శనాలపై టీటీడీ తీసుకున్న తాజా నిర్ణయం, అమలు విధానంపై భక్తుల్లో చర్చ జరుగుతోంది. సిఫార్సు లేఖల వ్యవస్థ, వీఐపీ దర్శనాల విధానంపై స్పష్టత ఇవ్వాలని, భవిష్యత్తులో ఇలాంటి సమస్యలు రాకుండా ముందస్తు ఏర్పాట్లు చేయాలని భక్తులు కోరుతున్నారు.
