రాయలసీమ న్యూస్, వై.యస్.ఆర్: కడప జిల్లా బద్వేల్లో అన్నదమ్ములపై కత్తితో దాడి జరిగిన ఘటన కలకలం రేపింది. బద్వేల్ భవనారాయణ నగర్కు చెందిన వెంకట మదన్, దినేశ్ అన్నదమ్ములపై గురువారం రాత్రి దాడి జరిగి, ఇద్దరూ తీవ్రంగా గాయపడ్డారు. ఈ ఘటనతో స్థానికంగా ఉద్రిక్త పరిస్థితులు నెలకొన్నాయి.
పోలీసుల సమాచారం ప్రకారం, నెల రోజుల క్రితం స్కూటీకి సంబంధించిన గొడవపై మాట్లాడుకుందామని నిందితుడు యశ్వంత్, వెంకట మదన్, దినేశ్లను గుంతపల్లి క్రాస్ రోడ్డుకు పిలిపించాడు. అక్కడ మాట్లాడుకుంటున్న సమయంలో మాటామాటా పెరగడంతో పరిస్థితి ఉద్రిక్తంగా మారింది.
ఈ క్రమంలో యశ్వంత్ కత్తితో వెంకట మదన్, దినేశ్లపై దాడి చేసినట్లు తెలిసింది. ఆకస్మికంగా జరిగిన ఈ దాడిలో ఇద్దరూ తీవ్రంగా గాయపడ్డారు. అక్కడున్న వారు వెంటనే ఈ విషయాన్ని పోలీసులకు, 108 సిబ్బందికి సమాచారం అందించారు.
సూచన అందుకున్న పోలీసులు సంఘటనా స్థలానికి చేరుకుని గాయపడిన అన్నదమ్ములను బద్వేల్ ప్రభుత్వ ఆసుపత్రికి తరలించారు. అక్కడ ప్రాథమిక చికిత్స అందించిన వైద్యులు, వారి గాయాల తీవ్రత దృష్ట్యా మెరుగైన వైద్యం కోసం కడపలోని RIMS ఆసుపత్రికి తరలించాలని సూచించారు. అనంతరం వారిని అంబులెన్స్లో కడప RIMSకు తరలించారు.
దాడి ఘటనపై బద్వేల్ పోలీసులు కేసు నమోదు చేసి దర్యాప్తు ప్రారంభించారు. నిందితుడు యశ్వంత్ పరారీలో ఉన్నట్లు సమాచారం. అతన్ని పట్టుకునేందుకు ప్రత్యేక బృందాలను ఏర్పాటు చేసి గాలింపు చర్యలు చేపట్టినట్లు పోలీసులు తెలిపారు.
స్కూటీ గొడవతో మొదలైన విబేధాలు ఇంత పెద్ద దాడికి దారితీస్తుండటంపై స్థానికులు ఆందోళన వ్యక్తం చేస్తున్నారు. చిన్నచిన్న విబేధాలు కూడా హింసాత్మక ఘటనలుగా మారకుండా ఉండేందుకు పోలీసులు కఠిన చర్యలు తీసుకోవాలని వారు కోరుతున్నారు.
