రాయలసీమ న్యూస్, వై.యస్.ఆర్: కడప జిల్లా బ్రహ్మంగారి మఠం మండలం లింగాలదిన్నె గిరిజనుల భూముల అన్యక్రాంతం, భూ కబ్జాలపై ఆంధ్రప్రదేశ్ వ్యవసాయ కార్మిక సంఘం ఆధ్వర్యంలో జరుగుతున్న నిరసన కార్యక్రమానికి సిపిఎం మద్దతు తెలిపింది. గురువారం (2026 సెప్టెంబర్ 17) ఉదయం 10 గంటలకు మండల ఎమ్మార్వో కార్యాలయం ఎదుట కొనసాగుతున్న మూడవ రోజు రిలే నిరాహార దీక్షలను భారత కమ్యూనిస్టు పార్టీ (మార్క్సిస్టు) కడప జిల్లా కార్యదర్శి జి.చంద్రశేఖర్ సందర్శించారు.
ఈ సందర్భంగా ఆయన స్థానిక గిరిజన గ్రామస్తులు, బాధితులతో మాట్లాడి పరిస్థితులను తెలుసుకున్నారు. లింగాలదిన్నె గిరిజనుల భూములపై జరుగుతున్న అన్యక్రాంత ప్రయత్నాలు, భూ కబ్జాలపై ఆయన ఆందోళన వ్యక్తం చేశారు. పేదరికంలో మగ్గుతున్న ఎస్టీల భూములను రక్షించే బాధ్యత ప్రభుత్వంపై ఉందని, రెవెన్యూ శాఖ అధికారులు తక్షణం జోక్యం చేసుకోవాలని ఆయన అభిప్రాయపడ్డారు.
స్థానిక గిరిజన గ్రామస్తులు అందించిన వివరాలను ఆయన మీడియాతో పంచుకున్నారు. వారి సమాచారం ప్రకారం 2008లో అసైన్మెంట్ కమిటీ గుర్తించిన పేద గిరిజనులైన 74 మందికి డీకేటీ పట్టాలు మంజూరు చేసి, అప్పటి మండల తహసిల్దార్ అందజేశారని తెలిపారు. అనంతరం 2011లో వారికి పట్టాలు, ధృవీకరణ పత్రాల సర్టిఫికెట్లు ఇచ్చినట్లు పేర్కొన్నారు.
రెవెన్యూ రికార్డులలో కూడా ఈ భూముల వివరాలు ఉన్నాయని ఆయన వివరించారు. ప్రస్తుత ఎమ్మార్వో కార్తీక్ అందించిన సమాచారం ప్రకారం రెవెన్యూ రికార్డు డీకేటీ రిజిస్టర్లలో సంబంధిత గిరిజనుల పేర్లు నమోదై ఉన్నాయని జి.చంద్రశేఖర్ చెప్పారు.
ఈ భూములపై స్థానికంగా ఉన్న ధనిక పెత్తందారులు కన్నేశారని, గిరిజనుల భూములను కబ్జా చేయాలనే ప్రయత్నాలు జరుగుతున్నాయని ఆయన ఆరోపించారు. పత్రాలు, దస్త్రాలు లేకుండా ఎస్టీల భూములపై దౌర్జన్యం చేసే వారిపై పి.డి.ఆక్ట్ నమోదు చేసి కఠిన చర్యలు తీసుకోవాలని ఆయన డిమాండ్ చేశారు.
ఎస్టీల భూములకు శాశ్వత రక్షణ కల్పించేందుకు జిల్లా పరిపాలన ముందుకు రావాలని జి.చంద్రశేఖర్ కోరారు. జిల్లా జాయింట్ కలెక్టర్ స్వయంగా వచ్చి ఎస్టీల భూములను పరిశీలించాలని, ఫ్రీ హోల్డ్ చట్టం ద్వారా ఎస్టీల భూములను ఆన్లైన్ చేసి, సంబంధిత గిరిజనులకు పాస్ బుక్స్, టైటిల్ డీడ్లు అందజేయాలని ఆయన అభ్యర్థించారు.
లింగాలదిన్నె గిరిజనుల సమస్యపై ప్రభుత్వం, జిల్లా అధికారులు స్పందించి, భూములపై జరుగుతున్న అన్యక్రాంత ప్రయత్నాలను వెంటనే ఆపాలని ఆయన కోరారు. గిరిజనుల హక్కులను కాపాడే వరకు పోరాటం కొనసాగుతుందని సిపిఎం నేతలు పేర్కొన్నారు.
ఈ కార్యక్రమంలో సిపిఎం మండలం కార్యదర్శి జి.సునీల్ కుమార్, ఆంధ్రప్రదేశ్ వ్యవసాయ కార్మిక సంఘం జిల్లా ఉపాధ్యక్షులు జి.గురయ్యా, ఎన్.వీరయ్య తదితరులు పాల్గొన్నారు. రిలే నిరాహార దీక్షలకు స్థానిక గిరిజన గ్రామస్తులు, రైతు కార్మికులు సంఘీభావం తెలుపుతున్నారు.
