రాయలసీమ న్యూస్, వై.యస్.ఆర్: ప్రొద్దుటూరు: గోపవరం గ్రామ పంచాయతీ పరిధిలోని TSR, NSR కళ్యాణ మండపాల నిర్మాణం, వినియోగం, భద్రతా ప్రమాణాలపై పలు అక్రమాలు, నిబంధనల ఉల్లంఘనల ఆరోపణలు వెలువడుతున్నాయి. ఈ మండపాల భవన అనుమతులు, సెట్బ్యాక్, పార్కింగ్, ఫైర్ సేఫ్టీ నిబంధనలు, అలాగే ప్రభుత్వ భూమి ఆక్రమణలపై సమగ్ర విచారణ జరపాలని కోరుతూ ప్రొద్దుటూరు మండల మేజిస్ట్రేట్కు అధికారిక ఫిర్యాదు అందింది.
'టౌన్ ప్లానింగ్ మాన్షన్స్' వారపత్రిక ఎడిటర్ టప్పా షాకీర్ హుస్సేన్ ఈ విస్తృత ఫిర్యాదును సంబంధిత అధికారులకు సమర్పించారు. ఫిర్యాదుదారు అందించిన వివరాల ప్రకారం, TSR, NSR కళ్యాణ మండపాల నిర్మాణం, నిర్వహణ, భవన వినియోగం, భద్రతా ప్రమాణాలపై పలు అనుమానాలు వ్యక్తమవుతున్నాయని పేర్కొన్నారు. భవన అనుమతులు ఏ ప్రాతిపదికన మంజూరు చేశారో, ఒకే భవనంలో వివిధ రకాల వాణిజ్య కార్యకలాపాలకు చట్టపరమైన అనుమతి ఉందా లేదా అనే అంశాలను అధికారులు క్షుణ్ణంగా పరిశీలించాలని ఆయన విజ్ఞప్తి చేసినట్లు ఫిర్యాదులో పేర్కొన్నారు.
TSR కళ్యాణ మండపానికి సంబంధించి అనుమతి ఉద్దేశం, ద్వంద్వ వినియోగం, భద్రతా నిబంధనలు, ఆక్రమణల అంశాలపై ప్రధాన అభ్యంతరాలు వ్యక్తమయ్యాయి. ఈ భవనానికి అసలు ఏ ఉద్దేశంతో అనుమతి ఇచ్చారు, కమర్షియల్ షాపులు, వ్యాపార సముదాయాలు, భోజనశాలల నిర్వహణకు చట్టబద్ధమైన అనుమతులు ఉన్నాయా అనే విషయాన్ని స్పష్టంచేయాలని ఫిర్యాదుదారు కోరారు. ఒకే భవనంలో రెండు రకాల విభిన్న వినియోగాలకు ఏ చట్టం ప్రకారం అనుమతి మంజూరు చేశారో వెల్లడించాలని డిమాండ్ చేశారు.
అదేవిధంగా, TSR కళ్యాణ మండపంలో తప్పనిసరిగా ఉండాల్సిన పార్కింగ్ సౌకర్యం లేకపోవడం, సెట్బ్యాక్ నిబంధనలు పాటించకపోవడం, ఫైర్ సర్వీస్ శాఖ నుండి చెల్లుబాటయ్యే NOC లేకుండానే భవనాన్ని నిర్మించారని ఆరోపించారు. ప్రభుత్వ భూమి లేదా పంచాయతీ స్థలాన్ని ఆక్రమించడం, అనుమతి పొందిన ప్లాన్కు విరుద్ధంగా అదనపు అక్రమ నిర్మాణాలు చేసినట్లు ఫిర్యాదులో పేర్కొన్నారు.
NSR కళ్యాణ మండపానికి సంబంధించి కూడా పలు అంశాలపై అభ్యంతరాలు వ్యక్తమయ్యాయి. మొదట వాణిజ్య సముదాయం నిర్మాణానికి అనుమతి పొంది, ఆ తర్వాత దాన్ని అక్రమంగా కళ్యాణ మండపంగా మార్చారా అనే కోణంలో దర్యాప్తు చేయాలని ఫిర్యాదుదారు కోరారు. అసలు బిల్డింగ్ ప్లాన్, భవన అనుమతులు, ఆక్యుపెన్సీ సర్టిఫికేట్ లభ్యతపై సమగ్ర తనిఖీ చేయాలని సూచించారు. ఫైర్ సేఫ్టీ, పార్కింగ్, సెట్బ్యాక్ నిబంధనలను పూర్తిగా ఉల్లంఘించారనే ఆరోపణలపై కూడా విచారణ జరపాలని డిమాండ్ చేశారు.
ఈ వ్యవహారంపై గ్రామ పంచాయతీ కార్యదర్శి, పంచాయతీరాజ్ ఇంజనీర్, Town and Country Planning శాఖ, అగ్నిమాపక శాఖ, రెవెన్యూ శాఖ అధికారులు కలిసి ఉమ్మడిగా క్షేత్రస్థాయి పరిశీలన చేయాలని ఫిర్యాదులో కోరారు. అవసరమైతే పోలీసు శాఖ సహకారం తీసుకుని తనిఖీలు నిర్వహించాలని సూచించారు.
విచారణలో నిబంధనల ఉల్లంఘనలు రుజువైతే బాధ్యులపై చట్టప్రకారం కఠిన చర్యలు తీసుకోవాలని, అక్రమ నిర్మాణాలను తొలగించి భవన వినియోగాన్ని వెంటనే నిలిపివేయాలని ఫిర్యాదుదారు డిమాండ్ చేశారు. అలాగే విచారణ అనంతరం తీసుకున్న చర్యల వివరాలను లిఖితపూర్వకంగా నివేదించాలని సంబంధిత అధికారులను కోరినట్లు ఫిర్యాదులో పేర్కొన్నారు.
