రాయలసీమ న్యూస్, వై.యస్.ఆర్: కడప జిల్లా బ్రహ్మంగారిమఠం మండలం లింగాల దిన్నేపల్లె ఎస్టి కాలనీ వాసులకు న్యాయం చేయాలని డిమాండ్ చేస్తూ బద్వేల్ RDO కార్యాలయం ఎదుట వ్యవసాయ కార్మిక సంఘం ఆధ్వర్యంలో ధర్నా జరిగింది. ఎస్టి కాలనీ ప్రజల భూముల సమస్యను పరిష్కరించాలని, వారికి పాస్ పుస్తకాలు మంజూరు చేసి ఆన్లైన్ చేయాలని సంఘం నాయకులు కోరారు.
ధర్నాలో వ్యవసాయ కార్మిక సంఘం జిల్లా అధ్యక్షులు జి. శివకుమార్ మాట్లాడుతూ, 12 సంవత్సరాలుగా సాగులో ఉన్న భూములను ఇప్పుడు “మాకు కావాలి” అంటూ అడగడం అన్యాయమని పేర్కొన్నారు. 1938 సర్వే నెంబర్లో 200 ఎకరాలు ఆక్రమణకు గురైనప్పుడు సంబంధిత అధికారులు, నాయకులు ఏం చేశారని ప్రశ్నించారు. 18 సంవత్సరాలుగా దళితుల పక్షాన ఎప్పుడైనా నిలబడ్డారా, ఇప్పుడే దళితుల మీద ప్రేమ పుట్టిందా అని ఆయన విమర్శించారు.
దళితుల పేరు చెప్పి భూములను Solar కంపెనీకి అమ్ముకోవడానికి నాటకాలు చేస్తున్నారని జి. శివకుమార్ ఆరోపించారు. 1938 సర్వే నెంబర్లోని 1300 ఎకరాల భూమిని దళితులకు, అణగారిన వర్గాలకు పంచడానికి తాము సిద్ధంగా ఉన్నామని, అగ్రవర్ణ భూకబ్జాదారులు సిద్ధంగా ఉన్నారా అని ప్రశ్నించారు.
లింగాల దిన్నేపల్లె ఎస్టి కాలనీ వాసులకు వ్యతిరేకంగా నిలబడితే చరిత్ర హీనులుగా మిగిలిపోతారని హెచ్చరించారు. పేదలను అడ్డుకోవడం కాదు, దమ్ముంటే భూకబ్జాదారులను అడ్డుకోవాలని దళితుల మీద దొంగప్రేమ చూపిస్తున్న వారికి పిలుపునిచ్చారు.
ధర్నా సందర్భంగా సమస్యపై స్పందించిన బద్వేల్ RDO వారం రోజుల్లో సమస్యను పరిష్కరిస్తానని హామీ ఇచ్చారు. అవసరమైతే భూమిని పరిశీలనకు వస్తానని కూడా RDO తెలిపారు.
ఎస్టి కాలనీ వాసుల భూములపై స్పష్టమైన హక్కులు కల్పించేందుకు పాస్ పుస్తకాలు మంజూరు చేసి ఆన్లైన్ చేయాలని వ్యవసాయ కార్మిక సంఘం డిమాండ్ చేసింది. భూముల విషయంలో ఎస్టి కాలనీ ప్రజలకు అన్యాయం జరగకూడదని, వారి సాగు హక్కులను కాపాడాలని సంఘం నాయకులు కోరారు.
బద్వేల్ RDO కార్యాలయం దగ్గర జరిగిన ఈ ధర్నాకు CPM, Awaaz, DYFI, వృత్తిదారుల సంఘం నాయకులు, కార్యకర్తలు మద్దతు తెలిపారు. ఎస్టి కాలనీ వాసుల న్యాయమైన డిమాండ్లకు తాము అండగా ఉంటామని, భూముల సమస్య పరిష్కారం కోసం అవసరమైతే మరింత ఉధృతమైన పోరాటాలకు సిద్ధమని సంఘాలు ప్రకటించాయి.
