రాయలసీమ న్యూస్, వై.యస్.ఆర్: ముద్దనూరు పట్టణంలో బీఎస్ఎన్ఎల్ మొబైల్, ఇంటర్నెట్ సేవలపై వినియోగదారుల అసంతృప్తి రోజురోజుకూ పెరుగుతోంది. మండలంలో 19 గ్రామ పంచాయతీలు ఉండటంతోపాటు ప్రధాన కేంద్రంగా ఉన్న ముద్దనూరులోనే కమ్యూనికేషన్ సేవలు తరచూ నిలిచిపోతుండటంపై ప్రజలు తీవ్ర ఆగ్రహం వ్యక్తం చేస్తున్నారు. కరెంటు సరఫరా నిలిచిన వెంటనే బీఎస్ఎన్ఎల్ సిగ్నల్స్ కూడా అందుబాటులో లేకపోవడం, సిగ్నల్ ఉన్న సమయంలోనూ ఇంటర్నెట్ కనెక్టివిటీ సక్రమంగా పనిచేయకపోవడం వల్ల అన్ని వర్గాల వినియోగదారులు ఇబ్బందులు పడుతున్నారు.
ముఖ్యంగా విద్యార్థులు, వ్యాపారులు, ఉద్యోగులు, ప్రభుత్వ కార్యాలయాలు, బ్యాంకింగ్ సేవలపై ఆధారపడే వినియోగదారులు ఇంటర్నెట్ అంతరాయంతో తీవ్ర సమస్యలను ఎదుర్కొంటున్నారని స్థానికులు చెబుతున్నారు. ఫైబర్ ఇంటర్నెట్ కనెక్షన్లకు నెల, రెండు నెలలు, మూడు నెలలు, ఏడాది వంటి ప్యాకేజీలను ముందుగానే చెల్లించినప్పటికీ సేవలు మాత్రం తరచూ అంతరాయం కలుగుతున్నాయని వినియోగదారులు ఆరోపిస్తున్నారు.
కనెక్షన్ కోసం రుసుము ముందుగానే వసూలు చేస్తున్న సంస్థ, సేవల్లో అంతరాయం ఏర్పడిన సమయంలో వినియోగదారులకు తగిన పరిష్కారం అందించడంలో అదే వేగం చూపడం లేదని వారు ప్రశ్నిస్తున్నారు. నెట్ పనిచేయని సమయం కూడా ప్యాకేజీ కాలవ్యవధిలోనే తగ్గిపోతుండటంతో తాము చెల్లించిన మొత్తానికి పూర్తి స్థాయిలో సేవలు పొందలేకపోతున్నామని పలువురు వినియోగదారులు ఆవేదన వ్యక్తం చేస్తున్నారు.
సమస్యపై ఫిర్యాదు చేసేందుకు ముద్దనూరు బీఎస్ఎన్ఎల్ కార్యాలయానికి వెళ్లినా సిబ్బంది అందుబాటులో ఉండటం లేదని వినియోగదారులు పేర్కొంటున్నారు. సాంకేతిక లోపాలు ఏర్పడితే పరిష్కారం కోసం రోజుల తరబడి ఎదురుచూడాల్సి వస్తోందని వారు అంటున్నారు. ప్రధాన పట్టణంలోనే పరిస్థితి ఇలా ఉంటే మండలంలోని 19 గ్రామ పంచాయతీల పరిధిలోని వినియోగదారులకు సేవలు ఏ స్థాయిలో అందుతున్నాయో అధికారులు పరిశీలించాల్సిన అవసరం ఉందని స్థానికులు అభిప్రాయపడుతున్నారు.
అత్యవసర పరిస్థితుల్లో ఫోన్ సేవలు, ఇంటర్నెట్ అందుబాటులో లేకపోవడం మరింత ఇబ్బందికరంగా మారుతుందనే ఆందోళన ప్రజల్లో వ్యక్తమవుతోంది. తరచూ ఏర్పడుతున్న సాంకేతిక సమస్యలకు శాశ్వత పరిష్కారం చూపాలని, ముందస్తుగా ప్యాకేజీల రూపంలో రుసుములు వసూలు చేస్తున్నందున అందుకు అనుగుణంగా నిరంతరాయమైన సేవలు అందించాలని వినియోగదారులు కోరుతున్నారు.
ఈ విషయంపై ఫైబర్నెట్ సేవలకు సంబంధించి బీఎస్ఎన్ఎల్ సబ్ డివిజనల్ ఇంజనీర్ యశ్వంత్ను వివరణ కోరగా, వినియోగదారులు ఆన్లైన్ ద్వారా ఇంటర్నెట్ సమస్యపై ఫిర్యాదు చేయాలని, ఫిర్యాదు అందిన వెంటనే టెక్నీషియన్ను పంపించి సమస్యను పరిశీలించి సరిచేస్తామని ఆయన తెలిపారు.
ఆన్లైన్ ద్వారా ఇంటర్నెట్ సమస్యపై వినియోగదారులు ఫిర్యాదు చేయాలి. ఫిర్యాదు అందిన వెంటనే టెక్నీషియన్ను పంపించి సమస్యను పరిశీలించి సరిచేస్తాం.
ముద్దనూరు బీఎస్ఎన్ఎల్ కార్యాలయంలో సిబ్బంది ఎప్పటికప్పుడు అందుబాటులో ఉండేలా చర్యలు తీసుకోవడంతోపాటు నెట్వర్క్, ఫైబర్ వ్యవస్థలను పటిష్టం చేసి సేవల అంతరాయానికి చెక్ పెట్టాలని ఉన్నతాధికారులను వినియోగదారులు డిమాండ్ చేస్తున్నారు.
