రాయలసీమ న్యూస్, వై.యస్.ఆర్: రాయచోటి: రాయచోటి పట్టణంలోని తెలుగు దేశం పార్టీ కార్యాలయంలో టిడిపి మండల అధ్యక్షుడు గండికోట సుధాకర్, సంబేపల్లి మండలం క్లస్టర్ ఇంచార్జ్ విష్ణువర్ధన్ రెడ్డి కలిసి మీడియాతో మాట్లాడారు. వైసిపి ప్రభుత్వ కాలంలో పట్టణంలోని కాలనీల్లో అభివృద్ధి పూర్తిగా నిర్లక్ష్యానికి గురైందని ఇద్దరూ తీవ్రంగా విమర్శించారు.
వైసిపి ప్రభుత్వం కాలంలో రాయచోటి మున్సిపాలిటీ పరిధిలోని తిరుపతి నాయుడు కాలనీ, ఇందిరమ్మ కాలనీ, రాయుడు కాలనీ, NGO కాలనీ, లక్ష్మీపురం కాలనీల్లో కనీస అభివృద్ధి పనులు కూడా చేయలేదని టిడిపి నేతలు ఆరోపించారు. గుంతలను పూడ్చడం, రహదారి సౌకర్యం కల్పించడం, త్రాగునీటి సౌకర్యాలు ఏర్పాటు చేయడం వంటి ప్రాథమిక అవసరాలపైనా వైసిపి ప్రభుత్వం దృష్టి పెట్టలేదని పేర్కొన్నారు.
వైసిపి ప్రభుత్వంలో పేరుకే కాలనీలు - అభివృద్ధిలో శూన్యం.
గత వైసిపి ప్రభుత్వం కాలనీల్లో లేఔట్లు వేసి ప్రజలను ఆకర్షించినప్పటికీ, తరువాత కనీస సౌకర్యాలు కల్పించకుండా ప్రజలను ఇబ్బందులకు గురి చేసిందని గండికోట సుధాకర్, విష్ణువర్ధన్ రెడ్డి తెలిపారు. కాలనీల్లో రహదారులు, డ్రైనేజీలు, త్రాగునీటి పైపులు లేక ప్రజలు రోజువారీ జీవనంలో తీవ్ర ఇబ్బందులు పడాల్సి వచ్చిందని వారు పేర్కొన్నారు.
ప్రస్తుతం మంత్రి మండిపల్లి రాంప్రసాద్ రెడ్డి ఆధ్వర్యంలో పరిస్థితి మారుతోందని టిడిపి నేతలు అభిప్రాయపడ్డారు. గుడి, బడి, వైద్యం, విద్య, త్రాగునీటి వంటి అంశాల్లో రాజకీయాలకు తావు లేకుండా, అభివృద్ధి విషయంలో ప్రజలందరికీ సమాన ప్రాధాన్యత ఇస్తున్నారని వారు అన్నారు.
రాయచోటి మున్సిపాలిటీ పరిధిలోని కాలనీల్లో ఇప్పుడు మండిపల్లి రాంప్రసాద్ రెడ్డి సిమెంటు రహదారులు, డ్రైనేజీ వ్యవస్థలను ఏర్పాటు చేయిస్తూ అభివృద్ధి పనులను వేగవంతం చేస్తున్నారని టిడిపి నాయకులు తెలిపారు. ఈ పనులు పూర్తయ్యే సరికి కాలనీల రూపురేఖలు మారిపోతాయని, ప్రజలకు ప్రాథమిక సౌకర్యాలు అందుబాటులోకి వస్తాయని వారు ఆశాభావం వ్యక్తం చేశారు.
ఇప్పటికైనా వైసిపి నాయకులు గతంలో చేసిన నిర్లక్ష్యంపై ఆత్మపరిశీలన చేసుకోవాలని, ప్రజలకు న్యాయం చేసే విధంగా వ్యవహరించాలని గండికోట సుధాకర్, విష్ణువర్ధన్ రెడ్డి సూచించారు. అభివృద్ధి అంశంలో రాజకీయాలకు అతీతంగా ప్రజల ప్రయోజనాలే ముందుండాలని వారు వ్యాఖ్యానించారు.
