రాయలసీమ న్యూస్, వై.యస్.ఆర్:
అభివృద్ధి పై ఓపెన్ డిబేట్‌కు సిద్ధం: ఎంపీ అవినాష్ రెడ్డికి ఎమ్మెల్యే ఆదినారాయణ రెడ్డి సవాల్
కడప: అభివృద్ధి అంశంపై ఎంపీ వైఎస్ అవినాష్ రెడ్డి చర్చకు రావాలని జమ్మలమడుగు ఎమ్మెల్యే ఆదినారాయణ రెడ్డి సవాల్ విసిరారు. జమ్మలమడుగు అయినా, పులివెందుల అయినా సరే తాను ఓపెన్ డిబేట్‌కు సిద్ధంగా ఉన్నానని ఆయన స్పష్టం చేశారు.
కడప జిల్లా జమ్మలమడుగు రిపబ్లిక్ క్లబ్‌లో కూటమి నాయకులు, కార్యకర్తల సమావేశం జరిగింది. ఈ సమావేశంలో ఎమ్మెల్యే ఆదినారాయణ రెడ్డి వైఎస్సార్‌సీపీ నేతలపై తీవ్రస్థాయిలో విమర్శలు చేశారు. ముందస్తు బెయిల్ వ్యవహారాన్ని ప్రస్తావిస్తూ, గుండెపోటు పేరుతో నాటకం ఆడారని ఆరోపించారు.
కుటుంబ సభ్యులను పక్కన పెట్టారని ఆరోపిస్తూ వైఎస్ జగన్‌పై ఘాటు వ్యాఖ్యలు చేశారు. వైఎస్ జగన్‌పై ఉన్న CBI, ED కేసులను ప్రస్తావిస్తూ విమర్శలు గుప్పించారు. వైఎస్ అవినాష్ రెడ్డి, వైఎస్ భాస్కర్ రెడ్డిలపై కూడా ఆయన తీవ్ర వ్యాఖ్యలు చేశారు.
మాజీ ముఖ్యమంత్రి చంద్రబాబు నాయుడిపై గతంలో కేసులు, ఆరోపణలతో ఇబ్బందులకు గురిచేశారని ఆదినారాయణ రెడ్డి మండిపడ్డారు. DSC విషయంలో నిరుద్యోగులను మోసం చేశారని ఆరోపించారు. గత ఎన్నికల్లో వైఎస్సార్‌సీపీకి ప్రజలు 11 సీట్లు మాత్రమే ఇచ్చారని, రాబోయే ఎన్నికల్లోనూ ప్రజలు తగిన సమాధానం చెబుతారని వ్యాఖ్యానించారు.
ప్రధాని నరేంద్ర మోదీ, సీఎం చంద్రబాబు నాయుడు, డిప్యూటీ సీఎం పవన్ కళ్యాణ్ నాయకత్వంలోని కూటమి ప్రభుత్వంతోనే రాష్ట్రంలో అభివృద్ధి, సంక్షేమం సాధ్యమవుతుందని ఎమ్మెల్యే ఆదినారాయణ రెడ్డి పేర్కొన్నారు.
రాబోయే సోమవారం 5వ తేదీన సీఎం చంద్రబాబు నాయుడు ప్రొద్దుటూరు పర్యటనను విజయవంతం చేయాలని, ఈ పర్యటనకు నాయకులు, కార్యకర్తలు పెద్ద సంఖ్యలో హాజరై కూటమి శక్తిని ప్రదర్శించాలని ఆయన పిలుపునిచ్చారు.
