రాయలసీమ న్యూస్, వై.యస్.ఆర్: వైఎస్ఆర్ కడప జిల్లా కేంద్రంగా పనిచేస్తున్న కడప సిటిజన్ ఫోరం ఆధ్వర్యంలో ప్రధాన ఎన్నికల కమిషనర్ జ్ఞానేశ్ కుమార్ రాజీనామా చేయాలని డిమాండ్ చేస్తూ నిరసన, ధర్నా కార్యక్రమం నిర్వహించనున్నారు. ఈ కార్యక్రమాన్ని రేపు 10వ తేదీన కడపలో నిర్వహించేందుకు ఫోరం నాయకులు ఏర్పాట్లు పూర్తి చేశారు.
ఈ నేపథ్యంలో కడప సిటిజన్ ఫోరం జిల్లా కార్యాలయంలో వివిధ రాజకీయ పార్టీలు, ప్రజాసంఘాల నాయకులతో సమావేశం జరిగింది. ఈ సమావేశంలో ధర్నా కార్యక్రమానికి సంబంధించిన రూపరేఖలను ఖరారు చేసి, కరపత్రాలను విడుదల చేశారు. ప్రజల ఓటు హక్కు, రాజ్యాంగ పరిరక్షణ, ప్రజాస్వామ్య వ్యవస్థ పటిష్ఠతపై ఈ నిరసన ద్వారా ప్రశ్నలు లేవనెత్తాలని నాయకులు నిర్ణయించారు.
ఓటు మనది, దేశం మనది, రాజ్యాంగం మనది, పెత్తనం ఎవరిది?
ఈ నినాదాన్ని కేంద్రంగా చేసుకుని నిరసన కార్యక్రమాన్ని నిర్వహించనున్నట్లు నాయకులు తెలిపారు. ప్రజాస్వామ్య వ్యవస్థలో ఓటు హక్కు, రాజ్యాంగం ప్రజలదేనని, అయితే అధికార వినియోగం ఎవరి చేతుల్లో ఉందనే ప్రశ్నను సమాజం ముందుంచాలని వారు అభిప్రాయపడ్డారు.
కడప సిటిజన్ ఫోరం కార్యాలయంలో జరిగిన ఈ సమావేశంలో CPI జిల్లా కార్యదర్శి గాలి చంద్ర, CPM జిల్లా కార్యదర్శి G. చంద్రశేఖర్, UTF రాష్ట్ర కార్యదర్శి లక్ష్మీరాజా, రాయలసీమ కమ్యూనిస్టు పార్టీ రాష్ట్ర కార్యదర్శి రవి శంకర్ రెడ్డి, లెనిన్ ప్రసాద్, మండలం ప్రసాద్, SFI నాయకులు రవి, మల్లెల భాస్కర్, శివరాం, కామనూరు శ్రీనివాసులరెడ్డి, రామ్మోహన్, బాలోత్సవం నాయకులు రాహుల్, సరస్వతి, అరుణ, నిర్మల, రఘు తదితరులు పాల్గొన్నారు.
వివిధ వామపక్ష పార్టీలతో పాటు ప్రజాసంఘాల ప్రతినిధులు కూడా ఈ నిరసన కార్యక్రమానికి మద్దతు ప్రకటించారు. ప్రజాస్వామ్య వ్యవస్థలో ఎన్నికల నిర్వహణ, ఎన్నికల కమిషన్ పాత్ర, పారదర్శకత వంటి అంశాలపై చర్చిస్తూ, ప్రధాన ఎన్నికల కమిషనర్ జ్ఞానేశ్ కుమార్ బాధ్యత వహించి రాజీనామా చేయాలని వారు కోరారు.
రేపటి ధర్నా కార్యక్రమానికి విస్తృత స్థాయిలో ప్రజలు, యువజన సంఘాలు, మహిళా సంఘాలు హాజరుకావాలని సిటిజన్ ఫోరం నాయకులు పిలుపునిచ్చారు. ప్రజల ఓటు హక్కు, రాజ్యాంగ పరిరక్షణ కోసం ఈ నిరసన ఒక వేదికగా నిలవాలని వారు ఆశాభావం వ్యక్తం చేశారు.
