రాయలసీమ న్యూస్, వై.యస్.ఆర్: కడప జిల్లా వ్యాప్తంగా జరుగుతున్న 9వ జాతీయ పోషణ మాసం కార్యక్రమాలను సమన్వయంతో విజయవంతం చేయాలని జిల్లా కలెక్టర్ డా.శ్రీధర్ చెరుకూరి సంబంధిత శాఖల అధికారులకు ఆదేశాలు జారీ చేశారు. ‘మన అంగన్వాడీ – మన బాధ్యత’ అనే సందేశంతో ఈ కార్యక్రమాలు కొనసాగాలని ఆయన సూచించారు.
జిల్లాలోని అన్ని అంగన్వాడీ కేంద్రాల్లో పోషకాహారంపై దృష్టి సారిస్తూ ప్రత్యేక కార్యక్రమాలు నిర్వహించాలని కలెక్టర్ ఆదేశించారు. పోషకాహార వంటకాల ప్రదర్శనలు ఏర్పాటు చేసి, తల్లులు, గర్భిణులు, బాలింతలు, చిన్నారులకు అందుబాటులో ఉన్న స్థానిక ఆహార పదార్థాలతో ఆరోగ్యకరమైన వంటకాలను చూపించాలని సూచించారు.
పోషణ మేళాలు నిర్వహించి, ప్రజలకు సమతుల ఆహారం ప్రాముఖ్యత, పిల్లల ఎదుగుదలలో పోషకాహార పాత్రపై అవగాహన కల్పించాలని ఆయన పేర్కొన్నారు. అంగన్వాడీ కేంద్రాలకు వచ్చే పిల్లలు, గర్భిణులు, బాలింతలకు ఆరోగ్య పరీక్షలు తప్పనిసరిగా చేయాలని, ముఖ్యంగా రక్తహీనత పరీక్షలను ప్రాధాన్యంగా నిర్వహించాలని అధికారులకు సూచించారు.
పోషణ మాసం సందర్భంగా సామూహిక భోజన కార్యక్రమాలు నిర్వహించి, అందులో పోషక విలువలు ఉన్న ఆహార పదార్థాలను చేర్చాలని కలెక్టర్ ఆదేశించారు. ఈ కార్యక్రమాల ద్వారా గ్రామస్థాయిలోనే పోషకాహారంపై చైతన్యం పెంచేలా చర్యలు తీసుకోవాలని ఆయన సూచించారు.
జిల్లా స్థాయి, మండల స్థాయి అధికారులంతా సమన్వయంతో పనిచేసి, ఆరోగ్య, మహిళా మరియు శిశు సంక్షేమ, విద్య తదితర శాఖలతో కలిసి పోషణ మాసాన్ని అర్థవంతంగా నిర్వహించాలని కలెక్టర్ డా.శ్రీధర్ చెరుకూరి స్పష్టం చేశారు. ప్రజల్లో పోషకాహారంపై అవగాహన పెంపొందితేనే పిల్లలలో పోషకాహార లోపం, రక్తహీనత సమస్యలను తగ్గించవచ్చని ఆయన అభిప్రాయపడ్డారు.
