రాయలసీమ న్యూస్, వై.యస్.ఆర్: కడప: జిల్లా ఎస్పీ శ్రీ షెల్కే నచికేత్ విశ్వనాథ్ ఐపీఎస్ ఆదేశాల మేరకు కడప జిల్లా వ్యాప్తంగా పోలీసులు నైట్ పెట్రోలింగ్ను ముమ్మరంగా కొనసాగిస్తున్నారు. నేరాల నియంత్రణ, అసాంఘిక కార్యకలాపాల అరికట్టడం, ప్రజల్లో భద్రతాభావాన్ని పెంపొందించడం లక్ష్యంగా ప్రతి రోజు రాత్రి విస్తృతంగా గస్తీ నిర్వహిస్తున్నారు.
జిల్లాలోని పట్టణ, గ్రామ ప్రాంతాలన్నింటిలోనూ ప్రధాన రహదారులు, కాలనీలు, వాణిజ్య కేంద్రాలు, నివాస ప్రాంతాల్లో పోలీసు బృందాలు రాత్రి వేళల్లో గస్తీ తిరుగుతున్నాయి. ముఖ్యంగా నేరాలకు ఆస్కారం ఉన్న ప్రాంతాలు, చీకటి ఎక్కువగా ఉండే వీధులు, ఒంటరి ప్రదేశాల వద్ద అదనపు నిఘా ఏర్పాటు చేస్తున్నారు.
తాళాలు వేసిన ఇళ్ల వద్ద ప్రత్యేక నిఘా కొనసాగిస్తూ, యజమానులు బయటకు వెళ్లిన ఇళ్లను గుర్తించి, వాటి చుట్టుపక్కల అనుమానాస్పద కదలికలపై పోలీసులు దృష్టి సారిస్తున్నారు. అనుమానితులపై, పాత నేరస్తులపై ప్రత్యేక పర్యవేక్షణ కొనసాగిస్తూ, వారి కదలికలను నిశితంగా గమనిస్తున్నారు.
నేరాల నియంత్రణలో భాగంగా మొబైల్ చెక్ డివైస్లతో వాహనాల తనిఖీలు నిర్వహిస్తున్నారు. రాత్రి వేళల్లో ప్రయాణిస్తున్న వాహనాలను ఆపి, డ్రైవర్ల వివరాలు, వాహన పత్రాలు, ప్రయాణ ఉద్దేశ్యంపై పోలీసులు విచారణ చేస్తున్నారు. ఈ తనిఖీల ద్వారా అనుమానాస్పద వ్యక్తులను గుర్తించి, అవసరమైనప్పుడు స్టేషన్లకు తరలించి మరింత సమాచారం సేకరిస్తున్నారు.
జిల్లాలోని లాడ్జిల్లో కూడా పోలీసులు ఆకస్మిక తనిఖీలు చేపడుతున్నారు. అక్కడ బస చేస్తున్న వారి వివరాలను పరిశీలిస్తూ, గుర్తింపు పత్రాలు, నమోదు రికార్డులను చెక్ చేస్తున్నారు. లాడ్జిల్లో అక్రమ కార్యకలాపాలు జరగకుండా కఠిన నిఘా కొనసాగిస్తూ, నియమావళి ఉల్లంఘనకు పాల్పడిన వారిపై చట్టపరమైన చర్యలు తీసుకుంటున్నారు.
జిల్లా పోలీసు విభాగం చేపడుతున్న ఈ నైట్ పెట్రోలింగ్ చర్యలతో నేరాల నియంత్రణకు తోడ్పడటంతో పాటు, ప్రజల్లో భద్రతాభావం పెరుగుతుందని అధికారులు భావిస్తున్నారు. రాత్రి వేళల్లో ఎక్కడైనా అనుమానాస్పద కదలికలు గమనించినప్పుడు వెంటనే సమీప పోలీసు స్టేషన్కు సమాచారం ఇవ్వాలని ప్రజలను పోలీసులు కోరుతున్నారు.
