రాయలసీమ న్యూస్, వై.యస్.ఆర్: కడప జిల్లా లింగాల మండలంలో అరటితోటలో గంజాయి సాగు బయటపడింది. ఈ ఘటనలో ఒకరిని పోలీసులు అరెస్ట్ చేసి, గంజాయి స్వాధీనం చేసుకున్నారు. ఈ విషయాన్ని డీఎస్పీ మురళి నాయక్ వెల్లడించారు.
మంగళవారం డీఎస్పీ కార్యాలయంలో సీఐలతో కలిసి ఆయన మీడియా సమావేశం నిర్వహించారు. లింగాల మండలం కోమన్నూతల గ్రామానికి చెందిన నడిపి వెంగముని తన అరటితోటలో గంజాయి సాగు చేస్తున్నాడని సమాచారం అందిందని తెలిపారు. ఆ సమాచారంపై పోలీసులు దర్యాప్తు జరిపి, నడిపి వెంగమునిని అరెస్ట్ చేసినట్లు డీఎస్పీ వివరించారు.
అరెస్ట్ సమయంలో అతని వద్ద నుంచి 750 గ్రాముల గంజాయి స్వాధీనం చేసుకున్నామని డీఎస్పీ చెప్పారు. గంజాయి సాగు, గంజాయి విక్రయాలపై పోలీసులు కఠిన చర్యలు కొనసాగిస్తున్నట్లు ఆయన పేర్కొన్నారు.
అనుమతి లేని మాదక ద్రవ్యాల సాగు, నిల్వ, రవాణా, విక్రయాలపై చట్టపరమైన చర్యలు తప్పవని డీఎస్పీ హెచ్చరించారు. ఇలాంటి అక్రమ కార్యకలాపాలపై సమాచారం ఉంటే వెంటనే పోలీసులకు తెలియజేయాలని ప్రజలను కోరారు.
జిల్లాలో మాదక ద్రవ్యాల నిర్మూలనకు ప్రత్యేక దళాలు పనిచేస్తున్నాయని, గ్రామీణ ప్రాంతాల్లో కూడా పర్యవేక్షణను మరింతగా పెంచినట్లు పోలీసు వర్గాలు తెలిపాయి. గంజాయి సాగు, విక్రయాలపై నిఘా కొనసాగుతుందని, ఇలాంటి కేసుల్లో ఎవరినీ ఉపేక్షించబోమని డీఎస్పీ స్పష్టం చేశారు.
