రాయలసీమ న్యూస్, వై.యస్.ఆర్: కడప నగరపాలక సంస్థ మేయర్ పదవి బీసీకి కేటాయించే అవకాశంపై రాజకీయ వర్గాల్లో చర్చ జోరుగా సాగుతోంది. బీసీ రిజర్వేషన్ ఖరారైతే వైసీపీ నుంచి పలువురు సీనియర్ నేతల పేర్లు ముందుకు వస్తున్నాయి. ఈ నేపథ్యంలో పార్టీ అంతర్గతంగా కూడా మేయర్ అభ్యర్థిత్వంపై మంతనాలు మొదలైనట్లు సమాచారం.
మేయర్ పదవి బీసీకి కేటాయిస్తే మాజీ మేయర్ పాకా సురేశ్, సీనియర్ నేత మల్లికార్జున, రాష్ట్ర బీసీ సెల్ కార్యదర్శి సమ్మెట బసవరాజు, బీసీ కోటాలో మైనారిటీ నేత షఫీ పేర్లు ప్రధానంగా వినిపిస్తున్నాయని స్థానిక రాజకీయ వర్గాలు చెబుతున్నాయి. వీరిలో ఎవరికీ అవకాశం కల్పించాలనే దానిపై వైసీపీ నాయకత్వం తుది నిర్ణయం తీసుకునే అవకాశం ఉందని భావిస్తున్నారు.
పాకా సురేశ్ గతంలో మేయర్గా పని చేసిన అనుభవం ఉండటంతో మరోసారి ఆయనకు అవకాశం ఇవ్వాలా అనే చర్చ జరుగుతోంది. మల్లికార్జున స్థానికంగా సీనియర్ నేతగా, పార్టీకి బలమైన అనుబంధం కలిగిన నాయకుడిగా గుర్తింపు పొందారు. సమ్మెట బసవరాజు రాష్ట్ర బీసీ సెల్ కార్యదర్శిగా పనిచేస్తుండటంతో బీసీ వర్గాలపై ఆయనకు మంచి పట్టు ఉందని పార్టీ వర్గాలు అభిప్రాయపడుతున్నాయి.
బీసీ కోటాలో మైనారిటీ నేత షఫీ పేరు కూడా బలంగా వినిపిస్తోంది. మైనారిటీ వర్గాలకు ప్రాతినిధ్యం కల్పించే దిశగా వైసీపీ ఆలోచిస్తే షఫీకి అవకాశం ఇచ్చే అవకాశాన్ని కొందరు నాయకులు ఊహిస్తున్నారు. అయితే ఇవన్నీ ప్రస్తుతం రాజకీయ వర్గాల్లో వినిపిస్తున్న చర్చలే తప్ప పార్టీ అధిష్ఠానం నుంచి ఎలాంటి అధికారిక సంకేతాలు వెలువడలేదు.
కడప నగరపాలక సంస్థలో రిజర్వేషన్ ఖరారైన తర్వాతే మేయర్ పదవి ఎవరికి దక్కనుందనే దానిపై స్పష్టత వచ్చే అవకాశం ఉంది. బీసీ రిజర్వేషన్ అధికారికంగా ప్రకటించిన వెంటనే వైసీపీ లోపల అభ్యర్థిత్వంపై చర్చలు మరింత వేగం పుంజుకునే అవకాశం ఉందని రాజకీయ విశ్లేషకులు భావిస్తున్నారు.
