రాయలసీమ న్యూస్, వై.యస్.ఆర్: రాష్ట్రంలో కొత్త జిల్లాల ఏర్పాటు నేపథ్యంలో జిల్లా పరిషత్ల పునర్వ్యవస్థీకరణకు ప్రభుత్వం శ్రీకారం చుట్టింది. మొత్తం 28 జిల్లాలకు 28 జిల్లా పరిషత్లు ఏర్పాటు చేస్తూ ప్రభుత్వం ఉత్తర్వులు జారీ చేసింది. ఈ క్రమంలో ప్రస్తుత కడప జిల్లా పరిషత్ మూడు భాగాలుగా విభజించబడనుంది.
ప్రస్తుతం కడప జిల్లా పరిషత్లో 50 జడ్పీటీసీ స్థానాలు ఉన్నాయి. తాజా ఉత్తర్వుల ప్రకారం వీటిలో కొంత భాగం కొత్తగా ఏర్పడిన జిల్లాల పరిషత్లలో కలిసిపోనున్నాయి. రైల్వేకోడూరు, రాయచోటి నియోజకవర్గాల పరిధిలోని జడ్పీటీసీ స్థానాలు ఇకపై తిరుపతి, అన్నమయ్య జిల్లా పరిషత్లలో విలీనం కానున్నాయి.
రైల్వేకోడూరు నియోజకవర్గానికి చెందిన జడ్పీటీసీలు తిరుపతి జిల్లా పరిషత్లో, రాయచోటి నియోజకవర్గానికి చెందిన జడ్పీటీసీలు అన్నమయ్య జిల్లా పరిషత్లో కొనసాగుతాయి. ఈ మార్పులతో కడప జిల్లా పరిషత్ పరిధి కుదించబడినప్పటికీ, రాజంపేట నియోజకవర్గానికి చెందిన జడ్పీటీసీ స్థానాలు మాత్రం కడప జిల్లా పరిషత్కే చెందనున్నాయి.
ఈ పునర్వ్యవస్థీకరణ అనంతరం కడప జిల్లా పరిషత్లో జడ్పీటీసీ స్థానాల సంఖ్య 50 నుంచి 39కు తగ్గనుంది. అంటే, కొత్తగా అమలులోకి వచ్చే వ్యవస్థలో కడప జడ్పీ 39 జడ్పీటీసీ సభ్యులతో కొనసాగుతుంది. జిల్లాల విభజన నేపథ్యంలో స్థానిక సంస్థల పునర్విభజన కూడా అనివార్యమైందని అధికార వర్గాలు సూచిస్తున్నాయి.
జిల్లా పరిషత్ పరిమాణంలో మార్పులు వచ్చినప్పటికీ, రాష్ట్రంలోనే అతిపెద్ద జిల్లా పరిషత్గా కడప జడ్పీ కొనసాగడం విశేషంగా మారింది. ఇతర జిల్లాలతో పోలిస్తే జడ్పీటీసీ స్థానాల సంఖ్య ఎక్కువగా ఉండటంతో కడప జిల్లా పరిషత్కు ప్రత్యేక స్థానం ఏర్పడింది. కొత్త జిల్లాల పరిపాలన, స్థానిక సంస్థల పనితీరుపై ఈ మార్పుల ప్రభావం ఎలా ఉండబోతుందన్న దానిపై ఇప్పుడు రాష్ట్రవ్యాప్తంగా చర్చ నడుస్తోంది.
