రాయలసీమ న్యూస్, వై.యస్.ఆర్: కడపలో తెలుగు దేశం పార్టీ లో అంతర్గత విభేదాలు బహిరంగ స్థాయికి చేరుకున్నాయి. కడప ఎమ్మెల్యే మాధవిరెడ్డి నాయకత్వంపై స్థానిక నాయకులు, కార్యకర్తల అసంతృప్తి వ్యక్తమవుతోంది. ముఖ్యంగా కడప మునిసిపల్ కార్పొరేషన్ ఎన్నికలను దృష్టిలో పెట్టుకుని పార్టీ లోపలే సవాళ్లు, ఆరోపణలు వెల్లువెత్తుతున్నాయి.
కడప టీడీపీ నేత చెన్నంశెట్టి మురళీ, ఎమ్మెల్యే మాధవిరెడ్డిపై తీవ్రస్థాయిలో విమర్శలు గుప్పించారు. గత రెండేళ్లలో కడపలో టీడీపీని బలహీనపరిచారని, పార్టీని నాశనం చేశారనే ఆరోపణలు చేశారు. ఈ మేరకు ఒక ఆడియోను విడుదల చేసి, తన అభిప్రాయాలను వెల్లడించారు.
కార్పొరేషన్ ఎన్నికల్లో ఎమ్మెల్యే మాధవిరెడ్డి ఎంపిక చేసిన అభ్యర్థులను గెలిపించగలరా లేదా అన్న దానిపై చెన్నంశెట్టి మురళీ సవాల్ విసిరారు. వార్డు స్థాయిలో ఎమ్మెల్యే నిర్ణయించిన అభ్యర్థుల గెలుపు సామర్థ్యంపై ప్రశ్నలు లేవనెత్తారు.
పార్టీ జెండా మోస్తూ సంవత్సరాలుగా కష్టపడుతున్న కార్యకర్తలను విస్మరించి, ఇటీవలే ఇతర పార్టీల నుంచి వలస వచ్చిన వారికి ప్రాధాన్యం ఇస్తున్నారని చెన్నంశెట్టి మురళీ ఆరోపించారు. నిజమైన టీడీపీ కార్యకర్తలు ఎమ్మెల్యే మాధవిరెడ్డి వెంట లేరని, ఈ పరిస్థితి కడప కార్పొరేషన్లోని దాదాపు అన్ని డివిజన్లలో కనిపిస్తోందని ఆయన వ్యాఖ్యానించారు.
ఎమ్మెల్యే గెలుపు కోసం పోరాడి, కేసులు ఎదుర్కొన్న కార్యకర్తలను ఇప్పుడు పక్కనబెట్టారని, వారిపైనే దాడులు, కేసులు పెట్టించే స్థితికి వెళ్లడం దారుణమని చెన్నంశెట్టి మురళీ విమర్శించారు. దీంతో స్థానిక స్థాయిలో కార్యకర్తల్లో అసంతృప్తి మరింతగా పెరిగినట్లు తెలుస్తోంది.
రాబోయే కార్పొరేషన్ ఎన్నికల్లో మంత్రులను తెచ్చుకుని ప్రచారం చేసినా, పోలీసులు, రౌడీ షీటర్ల మద్దతుతో ఎన్నికల బరిలోకి దిగినా, ఎమ్మెల్యే మాధవిరెడ్డి ఓటమి ఖాయమని చెన్నంశెట్టి మురళీ అభిప్రాయపడ్డారు. ప్రస్తుతం కడపలో ఎమ్మెల్యే వ్యతిరేక వర్గానికే అధిక బలం ఉందని ఆయన పేర్కొన్నారు.
అసెంబ్లీ ఎన్నికల్లో కార్యకర్తల బలంతో మాధవిరెడ్డి గెలిచారని, ఇప్పుడు కార్పొరేషన్ ఎన్నికల్లో తన వ్యక్తిగత బలంతో గెలుపు సాధించగలరా లేదా అన్నది చూడాలని చెన్నంశెట్టి మురళీ సవాల్ చేశారు. ఈ పరిణామాలతో కడప టీడీపీ లోపల గుసగుసలు, గుంపుల రాజకీయాలు మరింత చర్చనీయాంశంగా మారాయి.
