రాయలసీమ న్యూస్, వై.యస్.ఆర్: ఆస్పిరేషనల్ జిల్లా కార్యక్రమంలో వైఎస్ఆర్ కడప జిల్లా వరుసగా మూడు త్రైమాసికాల్లో జాతీయ స్థాయిలో అగ్రస్థానంలో నిలిచిందని జిల్లా కలెక్టర్ డా. శ్రీధర్ చెరుకూరి తెలిపారు. శనివారం తిరుపతి జిల్లా కలెక్టరేట్లో నీతిఆయోగ్ సభ్యుడు డా. ఎం. శ్రీనివాస్ సమక్షంలో జరిగిన సమీక్ష సమావేశంలో జిల్లాలో సాధించిన పురోగతిని ఆయన వివరించారు.
మార్చి 2025, జూన్ 2025, మార్చి 2026 త్రైమాసికాల్లో ఉత్తమ సమ్మిళిత స్కోర్లు సాధించి వైఎస్ఆర్ కడప జిల్లా జాతీయ స్థాయిలో అగ్రస్థానంలో నిలిచినట్లు కలెక్టర్ తెలిపారు. ఉత్తమ పనితీరు కనబరిచిన జిల్లాగా నీతిఆయోగ్ నుంచి రూ.6.5 కోట్ల ప్రోత్సాహక బహుమతి లభించినట్లు ఆయన పేర్కొన్నారు.
ఆరోగ్యం-పోషకాహారం, విద్య, వ్యవసాయం-నీటి వనరులు, ఆర్థిక సమ్మిళితం, నైపుణ్యాభివృద్ధి, మౌలిక వసతులపై ప్రత్యేక దృష్టితో అభివృద్ధి కార్యక్రమాలు అమలు చేస్తున్నట్లు కలెక్టర్ వివరించారు. ఈ రంగాల్లో లక్ష్యబద్ధంగా చర్యలు తీసుకోవడం వల్ల జిల్లాలో సమగ్ర పురోగతి సాధ్యమైందని ఆయన తెలిపారు.
జిల్లాలో ఆరోగ్యం, విద్య, వ్యవసాయం, నీటి వనరులు, గ్రామీణ మౌలిక వసతుల రంగాల్లో గణనీయమైన పురోగతి నమోదైందని డా. శ్రీధర్ చెరుకూరి తెలిపారు. ఆరోగ్య-సంక్షేమ కేంద్రాలు, అత్యవసర వైద్య సేవలు, విద్యా సౌకర్యాలు, సూక్ష్మ సాగునీరు, పశుసంవర్ధక కార్యక్రమాలు, నీటి వనరుల పునరుద్ధరణ, గ్రామీణ రహదారులు, ఇంటర్నెట్, పౌర సేవా కేంద్రాల అభివృద్ధికి ప్రాధాన్యత ఇచ్చినట్లు ఆయన వివరించారు.
ఆస్పిరేషనల్ బ్లాక్ కార్యక్రమంలో సీకే దిన్నె, జమ్మలమడుగు మండలాల్లో తక్కువ స్థాయిలో ఉన్న సూచికలను గుర్తించి, సంబంధిత శాఖల సమన్వయంతో అభివృద్ధి కార్యక్రమాలు చేపడుతున్నట్లు జిల్లా కలెక్టర్ తెలిపారు. వెనుకబడిన సూచికలను మెరుగుపరచడంపై ప్రత్యేక దృష్టి పెట్టినట్లు ఆయన పేర్కొన్నారు.
జిల్లాలో స్మార్ట్ కిచెన్స్, ప్రాజెక్ట్ యాంట్స్, స్టార్టప్ కడప, ఇన్వెస్ట్ కడప వంటి వినూత్న కార్యక్రమాలను అమలు చేస్తున్నామని కలెక్టర్ తెలిపారు. అభివృద్ధి, పెట్టుబడులు, ఉపాధి అవకాశాల్లో జిల్లాను మరింత ముందుకు తీసుకెళ్లేందుకు అన్ని శాఖలు సమన్వయంతో పనిచేస్తున్నాయని డా. శ్రీధర్ చెరుకూరి వివరించారు.
