రాయలసీమ న్యూస్, వై.యస్.ఆర్: కమలాపురం: రాష్ట్రవ్యాప్తంగా పనిచేస్తున్న గ్రామ రెవెన్యూ సహాయకులు (వీఆర్ఏ) ఎదుర్కొంటున్న సుదీర్ఘ సమస్యలను ప్రభుత్వం తక్షణమే పరిష్కరించాలని ఏపీ గ్రామ రెవెన్యూ శాఖ జాయింట్ యాక్షన్ కమిటీ చైర్మన్ పెద్దన్న డిమాండ్ చేశారు. వీఆర్ఏల సేవలను ప్రభుత్వం గుర్తించి, వారికి తగిన హక్కులు, సౌకర్యాలు కల్పించే దిశగా స్పష్టమైన నిర్ణయాలు తీసుకోవాల్సిన అవసరం ఉందని ఆయన అభిప్రాయపడ్డారు.
వీఆర్ఏలకు పే స్కేల్ అమలు చేయడం, ఉద్యోగ భద్రత కల్పించడం, కారుణ్య నియామకాలను పూర్తి స్థాయిలో చేపట్టడం, అర్హులైన వారికి పదోన్నతులు కల్పించడం, వారి సేవలను రెగ్యులరైజ్ చేయాలని పెద్దన్న ప్రభుత్వాన్ని కోరారు. ఈ అంశాలపై ప్రభుత్వం ఇప్పటివరకు తీసుకున్న వైఖరి వీఆర్ఏల్లో తీవ్ర అసంతృప్తి కలిగించిందని ఆయన పేర్కొన్నారు.
తమ న్యాయమైన సమస్యలపై ముఖ్యమంత్రి, ఉప ముఖ్యమంత్రులకు ఇప్పటికే వినతిపత్రాలు అందజేసినప్పటికీ, ప్రభుత్వం నుంచి ఆశించిన స్థాయిలో స్పందన రాలేదని పెద్దన్న ఆవేదన వ్యక్తం చేశారు. వీఆర్ఏలు గ్రామస్థాయిలో రెవెన్యూ శాఖకు కీలకంగా సేవలందిస్తున్నప్పటికీ, వారికి అందుతున్న అరకొర వేతనాలు జీవన ప్రమాణాలకు ఏమాత్రం సరిపోవడం లేదని ఆయన వ్యాఖ్యానించారు.
పొరుగు రాష్ట్రం తెలంగాణలో ఇప్పటికే వీఆర్ఏలకు పే స్కేల్ అమలు చేసిన విషయాన్ని గుర్తుచేస్తూ, ఆంధ్రప్రదేశ్లో పనిచేస్తున్న సుమారు 20 వేల మంది వీఆర్ఏలకు కూడా తక్షణమే పే స్కేల్ వర్తింపజేయాలని పెద్దన్న డిమాండ్ చేశారు. ఒకే విధమైన పనులు చేస్తూ, రెండు రాష్ట్రాల్లో వేతనాల్లో భారీ తేడా ఉండటం అన్యాయమని ఆయన అభిప్రాయపడ్డారు.
వీఆర్ఏల సమస్యలపై ప్రభుత్వం ఇప్పటికైనా చొరవ తీసుకుని రెవెన్యూ శాఖ మంత్రి అనగాని సత్యప్రసాద్, ఆ శాఖ ప్రిన్సిపల్ సెక్రటరీ ఆధ్వర్యంలో వీఆర్ఏ ప్రతినిధులతో చర్చలు జరిపి పరిష్కార మార్గం కనుగొనాలని జేఏసీ కోరింది. సమస్యలను సానుకూలంగా పరిష్కరించేలా ప్రభుత్వం ముందుకు రావాలని పెద్దన్న ఆశాభావం వ్యక్తం చేశారు.
ప్రభుత్వం స్పందించని పక్షంలో రాష్ట్రవ్యాప్తంగా సహాయ నిరాకరణ ఉద్యమానికి దిగాల్సి వస్తుందని జాయింట్ యాక్షన్ కమిటీ హెచ్చరించింది. వీఆర్ఏల న్యాయమైన డిమాండ్లను పట్టించుకోకపోతే, రెవెన్యూ శాఖ పనితీరు దెబ్బతినే ప్రమాదం ఉందని కమిటీ నాయకులు ప్రభుత్వానికి హెచ్చరికలు జారీ చేశారు.
