రాయలసీమ న్యూస్, వై.యస్.ఆర్: మైదుకూరు: మండలంలో నెలకొన్న తీవ్ర వర్షాభావ పరిస్థితుల దృష్ట్యా రైతులు తమ పంటల ఎంపికలో జాగ్రత్తగా ఉండాలని మండల వ్యవసాయ అధికారి (ఏవో) అమర్నాథ్ రెడ్డి సూచించారు. జొన్నవరం గ్రామంలో నిర్వహించిన ‘పొలం పిలుస్తుంది’ కార్యక్రమంలో పాల్గొన్న ఆయన, ప్రస్తుత ఖరీఫ్ సీజన్లో నీటి ఎద్దడి నేపథ్యంలో రైతులు ప్రత్యామ్నాయ పంటల సాగు వైపు మొగ్గు చూపాలని పలు కీలక సూచనలు చేశారు.
ఖరీఫ్ కాలంలో వర్షపాతం తగ్గిపోవడంతో కేసీ కెనాల్ ఆయకట్టు, మెట్ట భూముల్లో సాగు కోసం ప్రభుత్వం ప్రత్యేక చర్యలు తీసుకుంటోందని ఏవో తెలిపారు. ఈ ప్రాంతాల్లో తక్కువ నీటితో పండే పంటలను ప్రోత్సహించేందుకు మినుములు, ఉలవ విత్తనాలను సబ్సిడీపై పంపిణీ చేసేందుకు ప్రభుత్వం ఇప్పటికే అనుమతినిచ్చిందని ఆయన పేర్కొన్నారు. అలాగే హైబ్రిడ్ జొన్న విత్తనాల పంపిణీ విషయమై కూడా ప్రభుత్వ స్థాయిలో పరిశీలన కొనసాగుతోందని, అనుమతి లభించిన వెంటనే రైతులకు అందుబాటులోకి తీసుకువస్తామని చెప్పారు.
సబ్సిడీ విత్తనాలు పొందేందుకు అర్హులైన రైతులు తమ పరిధిలోని రైతు సేవా కేంద్రాలు (ఆర్బీకే)ను సంప్రదించాలని ఏవో సూచించారు. భూగర్భ జలాలు గణనీయంగా తగ్గిపోయిన ప్రస్తుత పరిస్థితుల్లో బోర్ల కింద వరి సాగు చేయడం ప్రమాదకరమని, అలాంటి సాగు వల్ల నష్టాలు తప్పవని ఆయన హెచ్చరించారు. అందువల్ల తక్కువ నీటితో పండే మినుములు, ఉలవలు, జొన్న వంటి ప్రత్యామ్నాయ పంటల వైపు రైతులు దృష్టి మళ్లించాలని ఆయన విజ్ఞప్తి చేశారు.
ప్రభుత్వం అమలు చేస్తున్న వివిధ సంక్షేమ పథకాలు, రాయితీల ప్రయోజనాలు పొందాలంటే ప్రతి రైతు తప్పనిసరిగా 11 అంకెల విశిష్ట గుర్తింపు సంఖ్యను కలిగి ఉండాలని ఏవో అమర్నాథ్ రెడ్డి స్పష్టం చేశారు. ఈ సంఖ్య ఆధారంగా రైతు వివరాలు, సాగు చేస్తున్న పంటల సమాచారం ప్రభుత్వ డేటాబేస్లో నమోదు అవుతుందని, భవిష్యత్తులో పథకాల అమలులో ఇది కీలకంగా మారనుందని ఆయన వివరించారు.
ఖరీఫ్ సీజన్లో సాగు చేసిన ప్రతి పంట వివరాలను రైతులు తప్పనిసరిగా ఈ-క్రాప్ (పంట నమోదు) బుకింగ్లో నమోదు చేసుకోవాలని ఏవో కోరారు. పంట నమోదు ద్వారా భవిష్యత్తులో నష్టపరిహారం, పంట బీమా, ఇతర రాయితీల విషయంలో రైతులకు ఇబ్బందులు తలెత్తకుండా ఉంటుందని ఆయన సూచించారు.
జొన్నవరం గ్రామంలో జరిగిన ‘పొలం పిలుస్తుంది’ కార్యక్రమంలో గ్రామ వ్యవసాయ సహాయకుడు (వీఏఏ) మనోజ్, ప్రకృతి వ్యవసాయ సిబ్బంది, స్థానిక రైతులు పాల్గొన్నారు. కార్యక్రమంలో పాల్గొన్న రైతులకు అధికారులు వర్షాభావ పరిస్థితుల్లో పంటల ఎంపిక, నీటి వినియోగం, ప్రభుత్వ పథకాల ప్రయోజనాలపై అవగాహన కల్పించారు.
