రాయలసీమ న్యూస్, వై.యస్.ఆర్: దువ్వూరు: మండల కేంద్రమైన దువ్వూరులో డ్రైనేజీ సమస్య మళ్లీ మొదటికొచ్చింది. పోలీస్ స్టేషన్ ఎదురుగా ఏళ్ల తరబడి రోడ్డుపై ప్రవహిస్తున్న మురుగునీటి సమస్యకు సుమారు పది రోజుల క్రితం అధికారులు పరిష్కారం చూపినప్పటికీ, పరిస్థితిలో ఎలాంటి మార్పు రాలేదు. అధికారుల అసంపూర్తి పనుల కారణంగా మురుగు నీరు మళ్లీ రోడ్డుపైనే ప్రవహిస్తుండటంతో స్థానికులు, వాహనదారులు తీవ్ర అసహనం వ్యక్తం చేస్తున్నారు.
గతంలో ఉన్న సమస్య తీవ్రతను గుర్తించిన సంబంధిత అధికారులు డ్రైనేజీ నిర్మాణానికి హద్దులు నిర్ణయించారు. కాలువ నిర్మాణానికి అవసరమైన మార్కింగ్ చేసి పనులు ప్రారంభించినప్పటికీ, ఒకవైపు మాత్రమే నామమాత్రంగా పనులు చేపట్టి, మరోవైపు కాలువ తవ్వకం చేపట్టకపోవడంతో సమస్య మరింత జటిలమైంది. నీరు సాఫీగా వెళ్లే మార్గం లేకపోవడంతో కాలువ పొంగి రోడ్డు వెంబడి మురుగు ప్రవహించే పరిస్థితి ఏర్పడింది.
మురుగునీరు రోడ్డుపైకి రావడంతో ఆ ప్రాంతమంతా దుర్వాసన వెదజల్లుతోంది. దుర్వాసనతో పాటు దోమలు విపరీతంగా పెరిగిపోయి, సీజనల్ వ్యాధులు ప్రబలే ప్రమాదం పొంచి ఉందని స్థానికులు ఆందోళన చెందుతున్నారు. ముఖ్యంగా పోలీస్ స్టేషన్ పరిసర ప్రాంతంలో రోజూ వందలాది మంది ప్రజలు రాకపోకలు సాగించే పరిస్థితిలో మురుగునీటి సమస్య మరింత ఇబ్బందులు కలిగిస్తోంది.
రోడ్డుపై మురుగు ప్రవహించడంతో వాహనదారులు కూడా తీవ్ర ఇబ్బందులు పడుతున్నారు. మురుగునీటిలో వాహనాలు నడపాల్సి రావడంతో ప్రమాదాలు సంభవించే అవకాశం ఉందని వారు చెబుతున్నారు. పాదచారులు కూడా మురుగునీటిని దాటుకుంటూ వెళ్లాల్సి రావడంతో రోజువారీ జీవనంలో అంతరాయం కలుగుతోందని స్థానికులు ఆగ్రహం వ్యక్తం చేస్తున్నారు.
అధికారులు కేవలం తాత్కాలిక మరమ్మతులతో సరిపెట్టకుండా, మార్కింగ్ చేసిన విధంగా రెండు వైపులా పూర్తిస్థాయిలో డ్రైనేజీ కాలువను నిర్మించి శాశ్వత పరిష్కారం చూపాలని దువ్వూరు ప్రజలు విజ్ఞప్తి చేస్తున్నారు. సమస్యను నిర్లక్ష్యం చేస్తే ఆరోగ్య సమస్యలు మరింత పెరిగే ప్రమాదం ఉందని, వెంటనే చర్యలు తీసుకోవాలని సంబంధిత శాఖలపై ఒత్తిడి తెస్తున్నారు.
