రాయలసీమ న్యూస్, వై.యస్.ఆర్: మైదుకూరు నియోజకవర్గంలో నెలకొన్న తాగునీటి సమస్యను పరిష్కరించేందుకు ఎమ్మెల్యే పుట్టా సుధాకర్ యాదవ్ చొరవ తీసుకున్నారు. గత రెండు రోజులుగా నియోజకవర్గంలోని పలు గ్రామాలు, పట్టణాల్లో పర్యటించిన ఆయనకు స్థానికులు తాగునీటి కొరత తీవ్రంగా ఉందని వివరించారు. దీనిపై వెంటనే స్పందించిన ఎమ్మెల్యే, సంబంధిత అధికారులతో సంప్రదింపులు ప్రారంభించారు.
ఈ క్రమంలో KC కెనాల్ ఉన్నతాధికారులతో ఎమ్మెల్యే పుట్టా సుధాకర్ యాదవ్ ఫోన్ ద్వారా మాట్లాడారు. కొన్ని రోజులపాటు KC కెనాల్కు నీటిని విడుదల చేస్తే నియోజకవర్గంలోని అనేక ప్రాంతాల్లో తాగునీటి సమస్యను తాత్కాలికంగా అయినా అధిగమించవచ్చని ఆయన అధికారులు దృష్టికి తీసుకెళ్లారు. ఎమ్మెల్యే చొరవతో KC కెనాల్కు నీటిని ఈరోజు లేదా రేపటిలోగా విడుదల చేసే ఏర్పాట్లు చేస్తున్నట్లు అధికారులు తెలియజేశారు.
అయితే KC కెనాల్ పరిధిలోని రైతులు నీరు వస్తుందనే అంచనాతో తొందరపడి పంటలు సాగు చేయకూడదని ఎమ్మెల్యే సూచించారు. ప్రస్తుతం విడుదల చేయబోయే నీటిని ప్రధానంగా తాగునీటి అవసరాల కోసం, అలాగే కుంటలు, చెక్ డ్యామ్లను నింపుకోవడానికి మాత్రమే వినియోగించుకోవాలని ఆయన స్పష్టం చేశారు.
సాగునీటి కోసం ప్రత్యేకంగా నీటిని విడుదల చేస్తున్నట్లు అధికారుల నుంచి స్పష్టమైన ఆదేశాలు వచ్చే వరకు రైతులు పంటల సాగులోకి వెళ్లకూడదని ఎమ్మెల్యే పుట్టా సుధాకర్ యాదవ్ విజ్ఞప్తి చేశారు. సాగునీరు వస్తుందనే భావనతో ముందస్తుగా పంటలు వేసుకుంటే, తరువాత నీటి సరఫరా నిలిచిపోతే రైతులు నష్టపోయే అవకాశం ఉందని ఆయన హెచ్చరించినట్లు సమాచారం.
మైదుకూరు నియోజకవర్గంలో తాగునీటి సమస్యను దృష్టిలో ఉంచుకుని KC కెనాల్ నుంచి నీటి విడుదలకు ప్రయత్నాలు ప్రారంభించిన ఎమ్మెల్యే పుట్టా సుధాకర్ యాదవ్కు స్థానిక ప్రజలు, రైతులు కృతజ్ఞతలు తెలిపారు. తాగునీటి కొరతతో ఇబ్బందులు పడుతున్న గ్రామాలకు ఈ చర్య కొంత ఉపశమనం కలిగిస్తుందని వారు అభిప్రాయపడ్డారు.
