రాయలసీమ న్యూస్, కడప: మైదుకూరు నియోజకవర్గ పరిధిలోని పలు మండలాల్లో ఈ నెల 17, 18 తేదీల్లో విద్యుత్ సరఫరాలో అంతరాయం ఉండనున్నట్లు మైదుకూరు విద్యుత్ విభాగం ప్రకటించింది. 220 కేవీ విద్యుత్ కేంద్రం, మైదుకూరులో అత్యవసర మరమ్మతులు చేపడుతున్న నేపథ్యంలో ఈ చర్యలు తీసుకుంటున్నట్లు అధికారులు తెలిపారు.
వివరాల్లోకి వెళ్తే, సెప్టెంబర్ 17, 2026 గురువారం ఉదయం 6 గంటల నుంచి సెప్టెంబర్ 18, 2026 శుక్రవారం మధ్యాహ్నం 3 గంటల వరకు మైదుకూరు నియోజకవర్గంలోని అన్ని మండలాల్లో ఉన్న గ్రామాలకు, వ్యవసాయ మోటార్లకు, పరిశ్రమలకు అలాగే ఇతర వినియోగదారులకు విద్యుత్ సరఫరాలో అంతరాయం ఏర్పడనుంది.
అవకాశం ఉన్న మేరకు మరొక మార్గం ద్వారా గృహ అవసరాలు, వాణిజ్య అవసరాల కోసం విద్యుత్ సరఫరా చేయడానికి ప్రయత్నిస్తామని విద్యుత్ శాఖ అధికారులు పేర్కొన్నారు. అయితే ఏదైనా అననుకూల పరిస్థితులు ఏర్పడితే ఈ వినియోగదారులకు కూడా విద్యుత్ అంతరాయం కలిగే అవకాశం ఉందని స్పష్టం చేశారు.
వ్యవసాయ మోటార్లకు 3 ఫేజ్ విద్యుత్ సరఫరా విషయంలో ప్రత్యేక షెడ్యూల్ను ప్రకటించారు. బుధవారం రాత్రి 10 గంటల నుంచి గురువారం ఉదయం 6 గంటల వరకు, అలాగే గురువారం మధ్యాహ్నం 3 గంటల తరువాత వ్యవసాయ మోటార్లకు 3 ఫేజ్ విద్యుత్ ఇవ్వనున్నట్లు తెలిపారు. రైతులు ఈ షెడ్యూల్ను గమనించి తమ వ్యవసాయ పనులను సర్దుబాటు చేసుకోవాలని సూచించారు.
విద్యుత్ సరఫరాలో అంతరాయం కారణంగా గృహ, వాణిజ్య, పారిశ్రామిక వినియోగదారులు ముందస్తు ఏర్పాట్లు చేసుకోవాలని, అవసరంలేని ఇబ్బందులు ఎదుర్కోకుండా జాగ్రత్తలు తీసుకోవాలని విద్యుత్ విభాగం విజ్ఞప్తి చేసింది. మరమ్మతు పనులు నిర్దేశిత సమయంలో పూర్తయ్యేలా చర్యలు తీసుకుంటున్నామని, ప్రజలు సహకరించాలని కోరింది.
ఈ ప్రకటనను మైదుకూరు విద్యుత్ విభాగం ఈ.ఈ. డి.లక్ష్మీపతి విడుదల చేశారు. ప్రజలు ఈ షెడ్యూల్ను గమనించి, విద్యుత్ అంతరాయం సమయంలో సహకరించాలని ఆయన అభ్యర్థించారు.
