రాయలసీమ న్యూస్, వై.యస్.ఆర్: కడప జిల్లా ప్రొద్దుటూరు పరిసరాల్లో వన్యప్రాణుల చర్మాల అక్రమ రవాణా చేస్తున్న ముఠాను అటవీశాఖ అధికారులు బట్టబయలు చేశారు. మైదుకూరు ఫారెస్ట్ స్పెషల్ టీమ్ నిర్వహించిన దాడుల్లో ముగ్గురు నిందితులు అరెస్టు కాగా, మరో నిందితుడు పరారీలో ఉన్నట్లు అధికారులు వెల్లడించారు.
అటవీశాఖ అధికారులు తెలిపిన వివరాల ప్రకారం, నిందితుల వద్ద నుంచి మొత్తం 5 చర్మాలు, 23 పులి గోర్లు స్వాధీనం చేసుకున్నారు. స్వాధీనం చేసుకున్న చర్మాలను నిపుణుల సహాయంతో పరిశీలించగా, అందులో ఒక దుప్పి చర్మం అసలైనదిగా, మిగిలిన పులి చర్మాలు నకిలీవిగా ఉన్నట్లు గుర్తించినట్లు తెలిపారు. పులి గోర్ల అసలుదనంపై కూడా తదుపరి పరీక్షలు కొనసాగుతున్నాయని అధికారులు పేర్కొన్నారు.
ఈ అక్రమ రవాణా వ్యవహారానికి కడప పట్టణంతో సంబంధాలు ఉన్నట్లు ప్రాథమిక విచారణలో బయటపడినట్లు అటవీశాఖ వర్గాలు తెలియజేశాయి. నిందితులు ఎక్కడి నుంచి ఈ చర్మాలు, గోర్లు తెచ్చారు, ఎవరికి సరఫరా చేయాలనుకున్నారు, ఎలాంటి మధ్యవర్తులు ఈ నెట్వర్క్లో ఉన్నారు అనే అంశాలపై అధికారులు లోతుగా దర్యాప్తు చేస్తున్నారు.
పరారీలో ఉన్న మరో నిందితుడి కోసం అటవీశాఖ ప్రత్యేక బృందాలు గాలింపు చర్యలను ముమ్మరం చేశాయి. నిందితుల నుంచి స్వాధీనం చేసుకున్న వస్తువులు, వారి కాల్ డేటా, ప్రయాణ వివరాల ఆధారంగా స్మగ్లింగ్ నెట్వర్క్ పూర్తి స్థాయిలో బయటపడేలా దర్యాప్తు కొనసాగుతున్నట్లు సమాచారం.
వన్యప్రాణుల సంరక్షణ చట్టాల ఉల్లంఘనకు సంబంధించిన ఈ కేసులో సంబంధిత సెక్షన్ల కింద నిందితులపై చర్యలు తీసుకుంటున్నట్లు అటవీశాఖ వర్గాలు పేర్కొన్నాయి. అక్రమ వేట, చర్మాల రవాణా, వన్యప్రాణుల భాగాల కొనుగోలు–అమ్మకాలకు పాల్పడేవారిపై కఠిన చర్యలు తప్పవని అధికారులు హెచ్చరిస్తున్నారు.
ఈ కేసు దర్యాప్తు, తదుపరి చర్యలపై సమీక్ష కోసం నిర్వహించిన సమావేశంలో జిల్లా అటవీశాఖ అధికారి టి. రాజశేఖర్ బాబు, ప్రొద్దుటూరు సబ్ డీఎఫ్ఓ సంకేత్ సునీల్ గరుడ్ ఐఎఫ్ఎస్, ఎపిఆర్ఓ హేమాంజలి, నయంఅలి తదితరులు పాల్గొన్నారు. వన్యప్రాణుల సంరక్షణలో ప్రజల సహకారం కీలకమని, అనుమానాస్పదంగా వన్యప్రాణుల చర్మాలు, గోర్లు, ఇతర భాగాల కొనుగోలు–అమ్మకాలు గమనించిన వెంటనే అటవీశాఖకు సమాచారం అందించాలని అధికారులు సూచిస్తున్నారు.
