రాయలసీమ న్యూస్, వై.యస్.ఆర్: మైదుకూరు: కడప జిల్లాలో తెలుగు గంగ ప్రాజెక్టులు నీరులేక ఎండిపోతుండగా, జిల్లా ప్రజలకు తాగునీటి సమస్య తలెత్తకుండా వెంటనే నీరు విడుదల చేయాలని రైతు సేవాసమితి డిమాండ్ చేసింది. ఈ మేరకు మైదుకూరులో రేపు నిర్వహించనున్న నిరసన కార్యక్రమాన్ని విజయవంతం చేయాలని సమితి నాయకులు పిలుపునిచ్చారు.
రైతు సేవాసమితి ఆధ్వర్యంలో రేపు ఉదయం 10 గంటలకు మైదుకూరు పట్టణం కడప రోడ్డులోని అంబేద్కర్ సర్కిల్ వద్ద నిరసన కార్యక్రమం జరగనుంది. ఈ కార్యక్రమంలో రైతులు, ప్రజలు పెద్ద సంఖ్యలో పాల్గొని తమ సమస్యలను ప్రభుత్వ దృష్టికి తీసుకెళ్లాలని రైతు సేవాసమితి కడప జిల్లా అధ్యక్షుడు ఏవి. రమణ కోరారు.
మైదుకూరులో శనివారం జరిగిన సమావేశంలో మండల, పట్టణ సమితి నాయకులతో కలిసి ఏవి. రమణ మాట్లాడారు. గాలేరు నగరి, హంద్రనీవా ప్రాజెక్టులకు 13 టీఎంసీలు, తెలుగు గంగ ప్రాజెక్టులకు 10 టీఎంసీలు ప్రజల తాగునీటి కోసం వెలుగోడు నుండి విడుదల చేస్తున్నామని నంద్యాల జిల్లా కలెక్టర్ ద్వారా ప్రకటించి నెలరోజులు అవుతున్నప్పటికీ, ఇప్పటివరకు కడప జిల్లాలోని తెలుగు గంగ ప్రాజెక్టులకు చుక్క నీరు కూడా రాకపోవడం దారుణమని ఆయన అభిప్రాయపడ్డారు.
కడప జిల్లాలో నీరు లేక అడుగంటిపోయిన తెలుగు గంగ ప్రాజెక్టు రిజర్వాయర్లు sr1, sr2లకు తక్షణం నీరు విడుదల చేసి, జిల్లా ప్రజలకు తాగునీటి సమస్యలు తలెత్తకుండా రాష్ట్ర ప్రభుత్వం చర్యలు తీసుకోవాలని ఏవి. రమణ డిమాండ్ చేశారు. ప్రభుత్వ స్థాయిలో హామీలు ఇస్తూనే, భూస్థాయిలో అమలు జరగకపోవడం వల్లే ఈ పరిస్థితి ఏర్పడిందని ఆయన పేర్కొన్నారు.
రైతు సేవాసమితి ఆధ్వర్యంలో జరుగుతున్న ఈ నిరసన కార్యక్రమానికి అన్ని వర్గాల ప్రజలు, రైతులు సంఘీభావం ప్రకటించాలని సమితి నాయకులు కోరుతున్నారు. కడప జిల్లాలో తాగునీటి సమస్యను శాశ్వతంగా పరిష్కరించేలా ప్రభుత్వం స్పష్టమైన కార్యాచరణ ప్రణాళికను ప్రకటించాల్సిన అవసరం ఉందని వారు భావిస్తున్నారు.
ఈరోజు మైదుకూరులో జరిగిన సమావేశంలో రైతు సేవాసమితి మైదుకూరు నియోజకవర్గ కార్యదర్శి మాడిశెట్టి సహదేవుడు, సమితి మైదుకూరు మండల, పట్టణ నాయకులు కుర్రాకు ఎల్లయ్య, తిరువాయి పాటీ నరసింహులు, కాన గూడూరు రామ్మోహన్, చెక్ పోస్ట్ శ్రీనివాసులు, దాశ రెడ్డి గారి సుబ్బరాయుడు, పేట పెద్ద రామన్న, కోటయ్య గారి గురప్ప, రాజాల రామచంద్రుడు తదితరులు పాల్గొన్నారు.
